Qazaqstanda qarasoradan qaǵaz shyǵarmaq

ASTANA. KAZINFORM — Elimizde qarasorany óndiristik maqsatta qoldanbaq, qazir óndiris máselesin ınvestor zerdelep jatyr. Bul týraly Aýyl sharýashylyǵy mınıstri Aıdarbek Saparov málim etti.

— Ázirge qarasora óndirisi bastalǵan joq. Qazir ınvestor zertteý júrgizip, jer tańdap jatyr. Jalpy, óndiris tehnologııasyna baılanysty sheshim qabyldanady. Óndiriletin ónim boıynsha aıta ketý kerek, bul salada ónim túrleri óte kóp. Qaǵaz ónimderinen bastap, maıǵa deıin óndirýge bolady. Alaıda bizde tehnıkalyq qarasorany ósirýge ǵana ruqsat etilgenin eskere otyryp, ıaǵnı quramynda esirtkilik zat bolmaıdy, negizgi ónim joǵary deńgeıde qorǵalǵan qaǵaz bolýy múmkin, — dep jaýap berdi Aýyl sharýashylyǵy vıtse-mınıstri Azat Sultanov Úkimet otyrysynan keıin ótken baspasóz máslıhatynda.

Mınıstrdiń málimdeýinshe, qarasoradan jasalǵan qaǵaz — jeke kýálik, tólqujat, bank qujattaryna arnalǵan eksporttyq ónim bolmaq.

— Sondyqtan ázirge ınvestor zerdelep jatyr. Ol naryqtaǵy suranysqa qaraı beıimdeledi. Sonymen qatar barlyq ónim, boljam boıynsha, eksportqa baǵyttalady, — deıdi vedomstvo basshysy.

Sondaı-aq Azat Sultanov qarasoradan qaǵaz jasaý óndirisin Soltústik Qazaqstan oblysynda qolǵa alý qaralyp jatqanyn tilge tıek etti.

Eske salaıyq, Májilis bıyl sáýirde qarasorany óndiristik maqsatta paıdalanýǵa arnalǵan zań jobasyn maquldady.