Qazaqstanda karantın kezinde at týrızmine qyzyǵýshylyq artty

NUR-SULTAN. QazAqparat – Mamandardyń esepteýinshe álemdik koronavırýs pandemııasy búkil eldegi ishki týrızmniń damýyna erekshe serpin bergen. Qazaqstan da bul úrdisten tys qalǵan joq. Mundaı týrıstik ónimderdiń biri – at týrızmi. QazAqparat tilshisi pandemııa at týrızmine qalaı áser etkenin bilý úshin atshabarǵa baryp, atbegi ári at sportynyń bapkeri Erjan Maǵjaevpen áńgimelesip qaıtty.

«Alty jastan bastap atqa mindim. Kedergilerden atpen qarǵyp ótetin konkýrmyn. Qazir «Tulpar» sport klýbyndamyn. Bapker bolyp júrgenime 10 jyldaı bop qaldy. Shákirtterimniń jetistigi jaman emes. Olardyń ishinde meniń jolymdy qýyp, óz biliktilikterimen bólisip jatqandar da bar», - deıdi bapker ári atbegi Erjan Maǵjaev.

Onyń aıtýynsha pandemııa at týrızmine asa qatty áser ete qoımaǵan. Adamdar buryn da atshabarǵa zor yntamen kelip júretin. Oqshaýlaný kezinde de belsendi demalysqa degen suranys tipti arta bastapty.

«Dál osylaı at ústinde demalý qyzmetin biz ǵana usyna aldyq. Qazir álbette bizdiń sporttyq baǵyttaǵy jumysymyz toqtap qaldy. Pandemııa jaǵdaıyna baılanysty at sport túrlerinen ulttyq oıyndar men báıge uıymdastyrylmaıdy. Jalpy balalar 12 jastan keıin ǵana atqa mingizemiz. Onyń ózinde balanyń fızıkalyq jáne psıhologııalyq daıyndyǵyn bilip alý kerek. Maldan qoryqpaǵan abzal. Sebebi jylqylar sizdiń úreılenip turǵanyńyzdy sezip qoıady.

Búkil álemde at týrızmi demalýdyń arzan túrine jatpaıtynyn atap ótý kerek. Máselen Eýropada oqýshylar at sportynyń bir ǵana jattyǵýy úshin 100-150 dollar tóleýi múmkin. Al bizde ol bar-joǵy 10 myń teńge. Sol sebepti elordadaǵy sheteldikter osy arzan qyzmetti paıdalanyp, bizdi klýbqa kelip, at sportyn meńgerýge asyq», - deıdi at sporty túrlerinen bapker.

Erjan qazaqstandyq at sporty – qazaqtardyń mádenı murasy ekenine senimdi.

«Biz attyń ústinde, túıeniń qomynda ósken qazaqpyz. Osynaý babadan qalǵan muramyzdy jandandyryp, tanymaldyǵyn barynsha arttyrýymyz kerek. At sportynyń klassıkalyq túri boıynsha eń úlken problema – máselen konkýrdan balalar men jasóspirimderge arnalǵan sporttyq mekteptiń joqtyǵy. Jattyǵý jasaıtyndaı sapaly baza qalyptaspaǵan. At ústindegi sabaqty ótkizý úshin at mingisi keletin adamdar úshin ǵana emes, jylqylardyń ózine de jaıly jaǵdaı jasalýy tıis. Jazda at sportyn úıretý qıyn emes. Alaıda qysta kúrdeli. Máselen manejdiń ózin jylytý kerek. At sportyn meńgergisi keletinder qazir kóp. Alaıda bizde jańadan kelgenderdiń ózine de at jetispeıdi», - deıdi Erjan Maǵjaev.

Bapkerdiń aıtýynsha Qazaqstanda elıtaly jyly sharýashylyǵymen aınalysýǵa ábden múmkindik bar. Ol úshin nıet etken azamattardyń ózi de asyl tuqymdy jylqylardy ustaýy tıis.

«Bizdiń otandastarymyzdyń keıbiri jylqy sharýashylyǵyna qyzyǵyp, shetelden at satyp alady. Shetelden ákelinetin jylqylardyń baǵasy 3 myń eýrodan 1 mıllıon eýroǵa deıin shyǵýy múmkin. Bizdiń Otanymyzda nelikten jylqylardyń osyndaı asyl tuqymyn ósirmeske? Ózimizdiń tózimdi keletin adaı jylqysy kóp kúndik júriske shydaı alady. Máselen aqalteke tuqymdy jylqysy óziniń kórkimen ǵana emes, Absent atty bir ǵana ańyzǵa aınalǵan jylqymen álemge tanyldy», - deıdi Erjan.

Jas bapker Olımpıada oıyndarynyń baǵdarlamasyna kiretin at sportyna degen álemniń nazary erekshe ekenin eske saldy. Qazaqstandyq sportshylar álemdik sportshylarmen básekelesip, júldeli oryndardan úmitti bola alady.

«Jylqy sharýashylyǵy – shuǵyl nátıje beretin bıznes emes. Alaıda bul isti jolǵa qoıa bilgende úmitińizdi aqtap bere alady. Bul – keleshegi kemel joba», - dep túıdi Erjan Maǵjaev.