Qazaqstanda qaraquıryqty saqtaý jobasy iske qosyldy

NUR-SULTAN. QazAqparat – Sońǵy jyldary Qazaqstandaǵy qaraquıryqtyń sany 90%-ǵa azaıǵan. «SOS qaraquıryq» jańa jobasy eldiń ońtústiginde sútqorektilerdiń osy túrin saqtaý sharasyn kúsheıtýge kómektesedi, dep habarlaıdy QazAqparat Qazaqstannyń bıologııalyq sanalýandyqty qorǵaý qaýymdastyǵy saıtyna silteme jasap.

«SOS qaraquıryq» jobasy IUCN save our Species baǵdarlamasy boıynsha Halyqaralyq tabıǵatty qorǵaý odaǵynyń (IUCN) qoldaýymen Qazaqstannyń bıologııalyq sanalýandyqty qorǵaý qaýymdastyǵy arqyly iske asyrylýda. Maqsaty – joıylyp bara jatqan sútqorektiler men olardyń mekendeıtin ortasyn uzaq merzimge saqtalýyn qamtamasyz etý.

Joba aıasynda daladaǵy zertteýler, qaraquıryqtarǵa GPS baý baılaý jáne sol arqyly olardy baqylaý, jergilikti halyqpen jumys, sondaı-aq qaraquıryqtardy saqtaý úshin qosymsha sharalar ázirleý qarastyrylǵan.

«Qazaqstanda alǵash ret esepke alýdyń ártúrli ádisterin qoldana otyryp, qaraquıryqtardyń sanyn keshendi anyqtaý júrgiziledi. Budan bólek, Qazaqstan men Túrikmenstan shekarasyndaǵy qorshaýlar janýarlardyń kóshi-qonyna qalaı áser etetinin anyqtaý josparlanyp otyr. Keshendi jumys 2021 jyldyń kúzine deıin jalǵasady», delingen qaýymdastyq saıtynda.

Qaraquıryq (Gazella subgutturosa) – aıyr tuıaqty sútqorekti ań, Qazaqstanyń ońtústik aımaqtarynda taralǵan. Qazaqstannyń Qyzyl kitabyna engizilgen. Halyqaralyq «Qyzyl» tizimde joıylyp bara jatýyna baılanysty «Qaterli» (VU) deńgeı belgilengen. 2015 jylǵy málimetterge sáıkes, olardyń sany elimizde bir kezderi 200 myńǵa deıin jetken. Qazirgi tańda bul kórsetkish 13-15 myńǵa deıin kemigen.

«SOS qaraquıryq» jobasy Jabaıy janýarlardyń qonys aýdaratyn túrlerin saqtaý týraly konventsııanyń (Bonn konventsııasy) IUCN Save our Species baǵdarlamasynyń 2019 jyly qabyldanýy arqyly iske asyryldy. Baǵdarlama Ortalyqazııalyq sútqorektilerdiń bastamasyna (CAMI) qoldaý bildiretin Ortalyq Azııa aımaǵy úshin jasalǵan.

Joba IUCN Save Our Species baǵdarlamasy arqyly qarjylandyrylady.

Eske sala ketsek, tabıǵat qorǵaý ınspektorlarynyń Sharyn ulttyq parkinde erekshe albınos qaraquıryqty tapty.