Qazaqstanda qara metallýrgııa ónimderiniń óndirisi 2 esege jýyq ósti

ASTANA. QazAqparat - Qazaqstanda qara metallýrgııa salasynda 193 kásiporyn jumys isteıdi. Bul týraly ındýstrııalyq damý komıteti qara metallýrgııa jáne kómir ónerkásibi basqarmasynyń basshysy Janat Igisinov aıtty, dep habarlaıdy QazAqparat tilshisi.

«Óńdeý ónerkásibindegi qara metallýrgııanyń úlesi - shamamen 18,6 paıyz. Búgingi tańda salada 193 kásiporyn jumys isteıdi. Jalpy alǵanda, qara metallýrgııa kásiporyndarynda shamamen 36 400 adam eńbek etedi. Statıstıkaǵa sáıkes, 2017-2021 jyldary aralyǵynda qara metallýrgııa ónimderiniń óndirisi 1,9 ese ósti», - dedi Janat Igisinov «Ashyq saǵat alańy» jobasy aıasynda.

Onyń atap ótýinshe, saladaǵy negizgi kórsetkish sanalatyn naqty kólem ındeksi 2021 jyly 102,2 paıyzdy qurasa, 2022 jyldyń 9 aıynda 100 paıyz boldy.

«Árıne, tómendeý bar. Biraq menińshe, jyl sońyna deıin qýyp jetemiz jáne josparly kórsetkishterge qol jetkizemiz dep úmittenemin. Al bıyl qara metallýrgııa boıynsha jospar 103 paıyz oryndaldy», - dedi ol.