Qazaqstanda qar men jańbyr jıilep, tuman men boran sıreı bastaǵan

ASTANA. KAZINFORM – Ekologııa jáne tabıǵı resýrstar mınıstrligi qorshaǵan ortanyń 2023 jylǵy ahýaly týraly ulttyq baıandamany jarııalady.

- Keıingi 17 jylda (2006-2023 jj.) 1990-2006 jyldardyń aralyǵyndaǵy kezeńmen salystyrǵanda qalyń qar 1,8 ese, burshaq pen qatty jel 1,6 ese, qatty jańbyr 1,4 ese ósti. Al qatty tuman 43%-ǵa, qatty boran 19% azaıdy, - dep jazylǵan ulttyq baıandamada.

«Qazgıdromet» respýblıkalyq memlekettik kásipornynyń deregi boıynsha 2023 jyly el aýmaǵynda tirkelgen tabıǵı qubylystar 2022 jylmen salystyrǵanda 71-ge kóp bolǵan.

- «Qazgıdromet» RMK gıdrometeorologııalyq ortalyǵy respýblıka aýmaǵynda aýa raıynyń kenetten ózgerýi jáne qaýipti tabıǵı meteorologııalyq qubylystar týraly 81 eskertý jasady.2023 jyly jyldamdyǵy 30 m/s kórsetkishinen asatyn 146 qatty jel tirkeldi. Eń jıi kúshti jelder Jetisý, Soltústik Qazaqstan, Jambyl jáne Almaty oblystarynda baıqaldy, - dep jazady mınıstrlik mamandary.

Solardyń ishinde Jetisý oblysynda 36 saǵat boıy 45 m/s jyldamdyqpen soqqan jel eń uzaq qubylys bolyp belgilengen.

- Mundaı jeldiń saldary elektr qýatynyń óshýi, joldyń jabylýy, shatyr jabyndarynyń jyrtylýy, aǵash butaqtarynyń synýy, kólikterdiń zaqymdanýy, bilim berý uıymdarynda sabaqtyń toqtatylýyna ákelip soqty, - delingen qujatta.

Osyǵan deıin Astana-Taldyqorǵan baǵytyndaǵy ushaq aýa raıynyń qolaısyzdyǵyna baılanysty ushpaı qalǵany týraly jazdyq.