Qazaqstanda qar basý qaýpi bar joldar 400 shaqyrymǵa qysqardy
ASTANA. KAZINFORM – Sońǵy úsh jylda respýblıkalyq mańyzy bar avtomobıl joldarynyń qar basý qaýpi joǵary ýchaskeleri 400 shaqyrymnan astamǵa qysqardy. Qazir mundaı joldardyń jalpy uzyndyǵy 2,2 myń shaqyrymǵa jýyq. Bul týraly «QazAvtoJol» UK» AQ basqarma tóraǵasy Darhan Imanashev Ortalyq kommýnıkatsııalar qyzmetinde ótken brıfıngide málimdedi.
Kompanııa deregine sáıkes, 2023 jyly qar basý qaýpi bar joldardyń uzyndyǵy 2,6 myń shaqyrym bolǵan. Qazir bul kórsetkish 16 paıyzǵa azaıǵan.
Joldardy qardan qorǵaý úshin arnaıy qorshaýlar men jasyl beldeýler ornatylyp jatyr. Máselen, turaqty temirbeton qar toqtatqysh qorshaýlardyń uzyndyǵy 403 shaqyrymnan 832 shaqyrymǵa deıin ulǵaıǵan.
Budan bólek, respýblıkalyq joldardyń boıynda jalpy uzyndyǵy 6 063 shaqyrym bolatyn qar toqtatatyn orman beldeýleri jáne 101 shaqyrym ýaqytsha qorǵanysh qalqany bar.
— Bul qorshaýlar jel aıdap ákelgen qardy jolǵa jetkizbeı toqtatady. Sonyń arqasynda joldy qardan qaıta-qaıta tazartý qajettiligi azaıady, - dedi Darhan Imanashev.
Onyń sózinshe, mundaı sharalar qys mezgilinde joldardyń ashyq bolýyna jáne kólik qozǵalysynyń qaýipsizdigin saqtaýǵa baǵyttalǵan.
Buǵan deıin respýblıkalyq mańyzy bar avtomobıl joldaryn qysqy kútip ustaýǵa arnalǵan tehnıkanyń daıyndyǵy jóninde jazǵan edik.
