Qazaqstanda qaptamany kádege jaratý alymy engiziledi

NUR-SULTAN. QazAqparat - Qazaqstanda qaptamany kádege jaratý alymy engiziledi. Bul týraly QR ekologııa, geologııa jáne tabıǵı resýrstar mınıstrligi Óndirýshilerdiń keńeıtilgen mindettemelerin júzege asyrý basqarmasynyń basshysy Jasulan Nurǵalıev aıtty, dep habarlaıdy QazAqparat tilshisi.

«Taıaý aıdyń ishinde qaptamany kádege jaratý alymy engiziletin bolady. Búgingi kúni buıryq, normatıvtik-quqyqtyq akti daıyn jáne memlekettik organdarmen kelisý satysynan ótip jatyr. Jaqynda ýaqytta, múmkin osy ne kelesi aıda normatıvtik-quqyqtyq akti qabyldanyp, Ádilet mınıstrliginde tirkeledi dep úmittenemin», - dedi ol plastıka qaldyqtaryn jınaý jáne qaıta óńdeý taqyrybyna arnalǵan dóńgelek ústel otyrysy barysynda.

Onyń atap ótýinshe, atalǵan normatıvtik-quqyqtyq akti jarııa túrde talqylanǵan. Endi tek memlekettik organdarmen, «Atameken» Ulttyq kásipkerler palatasymen kelisý ǵana qalyp otyr. Odan keıin Ádilet mınıstrligi rásimdeýi tıis.

Sonymen qatar ol qaptamany kádege jaratý alymynyń da stavkasy qansha bolatyndyǵyn aıtyp berdi.

«Boljaldy málimetterge sáıkes, ár bótelkege 0,5 teńge nemese 10 tıyn bolady. Eń úlken stavka 1,5 teńge mólsherinde shyny bótelkelerge belgilenip otyr. Onyń ózi de salmaǵyna baılanysty. Qaptamany kádege jaratý alymyn óndirýshiler men ımporttaýshylar tóleıdi. Biz muny 2018 jyly engizýdi josparlaǵan edik. 2017 jyldan jumystardy qolǵa aldyq. Bul máseleni tyńǵylyqty qarastyrdyq», - dedi Ekologııa mınıstrliginiń ókili.