Qazaqstanda qantty júgeri men bıdaıdan óndirý usynyldy

ASTANA. QazAqparat – Senat depýtaty Zákirjan Kýzıev qant óndirý salasyn damytýǵa qatysty birqatar usynys aıtty, dep habarlaıdy QazAqparat tilshisi.

«Aýyl sharýashylyǵy mınıstrligi ázirlegen qant salasyn damytý baǵdarlamasy jumys istemeı tur. Olardyń jospary boıynsha 2021 jyly otandyq shıkizattan qant óndirisi 121 myń tonnaǵa deıin artýy kerek edi, al is júzinde 39 myń tonna ǵana óndirilgen. Mamandar qant qyzylshasyn egýdi kóbeıtý úshin sharýalarǵa tıisti tehnıka, tuqym jáne sýarmaly jer jetispeıtinin aıtyp otyr. Bul rette baǵdarlamada 2022-2026 jyldarǵa bıýdjetten 495 mlrd teńge somasynda qarjylandyrý eskerilgen», - dedi Z. Kýzıev búgin Senatta ótken Úkimet saǵatynda.

Ol basqa shıkizat túrinen qant óndirisin damytýdy usyndy.

«Bul turǵyda júgeri nemese bıdaıdan óndiriletin glıýkozalyq-frýktoza shárbatyn qarastyrǵan jón. Bul daqyldar qazirdiń ózinde bizdiń elde jetkilikti mólsherde ósirilip keledi jáne tamaq ónerkásibinde qantty almastyra alady. Statıstıkaǵa súıensek, 2022 jyly Qazaqstanda 2 mıllıard lıtrge jýyq túrli sýsyndar óndirilip, shamamen 200 myń tonna qant paıdalanylǵan. Sýsynnyń ár lıtrinde ortasha eseppen 100 gramm qant bar», - dedi depýtat.

«Bul kólem elimizde paıdalanylatyn qanttyń jartysyna jýyǵy. Osy kólemdi kóptegen elde sııaqty júgeri nemese bıdaıdan óndirilgen glıýkozalyq-frýktoza shárbatymen ońaı almastyra alamyz. Bul óz kezeginde qant ımportyn shamamen 50% azaıtýǵa múmkindik beredi», - dedi ol.

Budan buryn habarlanǵandaı, Aýyl sharýashylyǵy mınıstrligi qant óndirýshilerdi baǵa dempınginen qorǵaý tetigi engizilgenin jarııalady.