Qazaqstanda qańtarda 107 mlrd teńgeniń tústi metaldary óndirildi
ALMATY. QazAqparat - Qazaqstanda qańtar aıynda ǵana 107 mlrd teńge bolatyn tústi metal keni óndirildi, dep habarlaıdy QazAqparat tilshisi Finprom.kz-ke silteme jasap.
«2019 jyldyń qańtar aıynda tústi metal kenin óndirý kólemi 107 mlrd teńgege jetti. Bul ótken jyldyń kórsetkishimen salystyrǵanda 25,2 paıyzǵa artyq. Bul sońǵy jyldary tirkelgen eń aýqymdy kórsetkish ekenin atap ótý kerek. 2018 jyly ǵana atalmysh ken óndirisi 33,2 paıyzdyq ósimmen 85,5 mlrd teńgeni kórsetken bolatyn», - delingen habarlamada.
Eske sala ketsek, 2018 jyldyń 12 aıynda mys óndirisi 103,2 mln tonnaǵa jetip, ótken jyldyń kórsetkishinen 8,2 paıyz artyq bolǵan. Sol sekildi ótken jyly 12,9 mln tonna mys kontsentrattary (+15,7 paıyzdyq ósim), 4,8 mln tonna mysty-myryshty ken (-4,2 paıyzǵa kemigen), 580,6 myń tonna mys kontsentratyndaǵy mys (+15,5 paıyzdyq ósim) óndirilgen.
Qazaqstandyq mystyń negizgi tutynýshylary - Azııa men TMD elderi. 2018 jyldyń 12 aıynyń ishinde rafınattalǵan mystyń jáne óńdelmegen mys qorytpalarynyń eksport kólemi 2,4 mlrd dollarǵa jetken.
Jalpy, 2018 jyldyń 9 aıynda metal kenderine tartylǵan tikeleı sheteldik ınvestıtsııalardyń kólemi 368,2 mln dollardy quraǵan.
