Qazaqstanda qant tapshylyǵy bolmaıdy – Saýda mınıstri

ASTANA. QazAqparat – QR Premer-Mınıstriniń orynbasary – Saýda jáne ıntegratsııa mınıstri Serik Jumanǵarın Qazaqstanda qant tapshylyǵy bolmaıtynyn aıtty.

Onyń sózinshe, bir keli qant 450 teńgeden aspaıdy, dep habarlaıdy QazAqparat tilshisi.

«Nelikten bizde ınflıatsııa 18,8%-dy qurady? Inflıatsııaǵa eń úlken faktor bolǵan – qant, munda 75% qymbattaý boldy. Bul Reseıdiń óz eksportyn jabýyna baılanysty boldy. Buǵan jol bermeý úshin bıyl ár aımaq jeke qant zaýyttaryna bekitildi. Ár óńir aınalym qarajatyn basqa aımaqty emes, ózin qamtý úshin jumsaýy tıis», - dedi Serik Jumanǵarın Úkimet otyrysynan keıin jýrnalısterge.

Saýda mınıstri Qazaqstannyń óz qantymen 100 paıyz qamtamasyz etiletinin aıtty.

«Iá, quraq qant bolady, óıtkeni ázirge qyzylsha jetkiliksiz. Biraq bul ózimizdiń qant, sondyqtan endi qant tapshylyǵy bolmaıdy. Zaýyttarmen kelisim júrgizdik, zaýyttaǵy baǵasy kelisine 450 teńgeden aspaıdy», - dedi Serik Jumanǵarın.