Qazaqstanda qant óndiretin zaýyt salýǵa ınvestor tabylmaı otyr

NUR-SULTAN. QazAqparat – Qazaqstanda qant óndiretin tórt zaýyt jumys isteıdi. Bul týraly QR Aýyl sharýashylyǵy vıtse-mınıstri Jeńis Óserbaı aıtyp berdi, dep habarlaıdy QazAqparat tilshisi.

«Onyń ekeýi - Jambyl oblysynda, qalǵan ekeýi – Almaty oblysynda jumys isteıdi. Qazir atalǵan zaýyttardy jańǵyrtý júrgiziledi, sondaı-aq Jambyl oblysynda jańa zaýytty iske qosý josparlanǵan», - dedi spıker ortalyq kommýnıkatsııalar qyzmetinde ótken baspasóz máslıhatynda.

J. Óserbaı Jambyl oblysynda Merki qant zaýytynyń barlyq ónimin óńdeýge 75 kún ketetinin atap ótti.

B ul shıkizat pen qant qyzylshasyn egý alańdarynyń jetkiliksiz bolýyna baılanysty.

Sonymen birge, ol úsh zaýyt shıki qantty óńdep jatqanyn aıtty. Jalpy alǵanda, zaýyttar aıyna shamamen 50 myń tonna qant óndire alady.

«Importty almastyrý boıynsha jumys júrgizilip jatyr. Negizgi mindet – qant óndiriletin óz qyzylshamyzdy ósirý. Jyl saıyn 350 myń tonnaǵa deıin qant qyzylshasy jınalady. Fermerlerdi yntalandyrý úshin aýqymdy sýarý baǵdarlamasy júrgizilýde. 2021 jyly qant qyzylshasyn satyp alýǵa shamamen 7 mlrd teńge bólindi», - dedi Jeńis Óserbaı.

Sonymen birge, Pavlodar oblysynda taǵy bir zaýyt salý josparlanyp otyr, onyń qurylysyna ákimdik bastamashy bolǵan.

Qazirgi ýaqytta tehnıkalyq-ekonomıkalyq negizdeme ázirlendi, al zaýyttyń qurylys jumystary bastalǵan joq. Oǵan bir jyldan beri ınvestor izdep jatyr.

Aıta keteıik, saýda núktelerinde baǵany kóterý faktileri anyqtalsa, mynadaı keri baılanys arnalaryna habarlasqan jón: jergilikti atqarýshy organdar (ákimdikter), QR Saýda jáne ıntegratsııalar mınıstrligi tutynýshylar quqyǵyn qorǵaý komıtetiniń «e-Tutynushy» saıty, QR SIM saýda komıteti jáne QR Básekelestikti qorǵaý jáne damytý agenttigi.

Qazaqstanda shamamen 90 myń tonna qant qory bar jáne respýblıka qantpen tolyq qamtamasyz etilgen.