Qazaqstanda qant dıabetimen syrqattaný deńgeıi tómendedi
ASTANA. KAZINFORM – Qazaqstanda 2026 jyldyń birinshi toqsanynyń qorytyndysy boıynsha qant dıabetimen syrqattanýdyń negizgi kórsetkishteri tómendedi. Bul týraly Densaýlyq saqtaý mınıstrliginiń alqa otyrysynda Densaýlyq saqtaý mınıstriniń birinshi orynbasary Tımýr Sultanǵazıev málimdedi.
Vedomstvonyń málimetinshe, elimizde 1 jáne 2 tıpti qant dıabeti boıynsha jalpy syrqattanýshylyq kórsetkishi 100 myń turǵynǵa shaqqanda 308,7-ni qurady. Ótken jyldyń osy kezeńinde bul kórsetkish 313,5 bolǵan.
– Oń dınamıka endokrınologııalyq qyzmettiń damýy men medıtsınalyq-sanıtarııalyq alǵashqy kómek deńgeıinde profılaktıkalyq jumystyń kúsheıýi nátıjesinde baıqalyp otyr, – dedi Tımýr Sultanǵazıev.
Onyń aıtýynsha, óńirlerde endokrındik aýrýlardy dıagnostıkalaý, emdeý jáne aldyn alýmen aınalysatyn quzyret ortalyqtary ashylyp jatyr.
– Sonymen qatar beıindi bólimshelerdegi tósek qory keńeıtilip, dıabet mektepteri men mamandandyrylǵan kabınetter engizilýde. Bul qant dıabeti jáne basqa da endokrındik aýrýlary bar patsıentterge medıtsınalyq kómektiń qoljetimdiligi men sapasyn arttyrýǵa múmkindik beredi, – dedi ol.
Mınıstrlik deregine sáıkes, profılaktıkalyq maqsatta alǵashqy medıtsınalyq-sanıtarııalyq kómek uıymdaryna júginý úlesi de artqan.
2026 jyldyń birinshi toqsanynda bul kórsetkish josparlanǵan 27 paıyzdyń ornyna 33,4 paıyzǵa jetken.
Sozylmaly aýrýlary bar patsıentterdi baqylaý júıesin jetildirý aıasynda dıagnostıka men dınamıkalyq baqylaý tásilderi qaıta qaralǵan.
Nátıjesinde ınfektsııalyq emes aýrýlary bar patsıentterdi dınamıkalyq baqylaýmen qamtý deńgeıi shamamen úsh esege ósip, 12 paıyzdan 34 paıyzǵa deıin jetti.
Sonymen qatar mınıstrlik birqatar óńirde profılaktıkalyq tekserýlermen qamtý deńgeıiniń tómendigi, aýrýhanaǵa jatqyzýdy kútý merzimderiniń uzaqtyǵy jáne keıbir nysanaly kórsetkishterdiń oryndalmaýy sııaqty máseleler saqtalyp otyrǵanyn atap ótti.
Alqa otyrysynyń qorytyndysy boıynsha Densaýlyq saqtaý mınıstri Aqmaral Álnazarova óńirlerge alǵashqy medıtsınalyq-sanıtarııalyq kómektiń negizgi kórsetkishterine aı saıyn monıtorıng júrgizýdi, profılaktıkalyq jumysty kúsheıtýdi jáne sozylmaly aýrýlary bar patsıentterge kórsetiletin medıtsınalyq kómektiń sapasyn baqylaýdy tapsyrdy.
Aıta keteıik, Qazaqstanda jyl saıyn 1,5 mln endoskopııalyq zertteý júrgiziledi.
