Qazaqstanda qant dıabetine shaldyqqandarǵa tegin dári-dármekter tamyzda jetkizile bastaıdy
ASTANA. QazAqparat - Qazaqstandyq naýqastar jaqyn arada qant dıabeti men shashyrandy sklerozdy emdeýge arnalǵan preparattardy tegin alýdy jalǵastyra alady. Biryńǵaı dıstrıbıýtor qandaǵy glıýkoza deńgeıin anyqtaý arqyly, qant dıabetin emdeýge qajetti ınsýlın glargın jáne test-jolaqtardy, sondaı-aq shashyrandy sklerozdy emdeý úshin Interferon beta-1b preparatyn jetkizýge shartqa otyrdy. Dárilerdi aýrýhanalarǵa alǵashqy jetkizý tamyzda bastalady, dep habarlaıdy «SQ-Farmatsııa» JShS-nyń baspasóz qyzmeti.
Qant dıabetiniń dıagnostıkasyna jáne emine arnalǵan bul preparattar olarǵa shekti satyp alý baǵalarynyń ózgerýiniń arqasynda satyp alyndy. Halyqqa tegin dári-dármek satyp alý boıynsha «SQ-Farmatsııa» biryńǵaı dıstrıbıýtorynyń basqarma tóraǵasy Maksım Kasatkınniń aıtýynsha, bul preparattarǵa baǵa baǵamnyń ózgerýi jáne qunsyzdaný kórsetkishterinen keıin de ózgerissiz qalǵan, bul jyly óndirýshilerge mundaı talaptarmen tenderlik rásimderge qatysý tıimsiz bolyp qaldy. «Biryńǵaı dıstrıbıýtor ótken jyldyń jazynan bastap birneshe ret osy preparattardy satyp alýǵa tender jarııalady. Biraq, ókinishke oraı, ónim berýshilerdiń eshqaısysy áli ótinim bermedi. Sondyqtan jaqyn ýaqytqa deıin bizge bul dári-dármekterdi satyp alýdyń jáne bizdiń emdelýshilerdi qamtamasyz etýdiń sáti kelmedi», - dep túsindirdi «SQ-Farmatsııa» basqarma tóraǵasy.
«Osy syrqattardyń áleýmettik mańyzdylyǵyn eskerile otyryp, Densaýlyq saqtaý mınıstrliginiń 2017 jylǵy 11 mamyrdaǵy buıryǵymen, qazaqstandyqtardy olarǵa asa qajetti dári-dármekpen qamtamasyz etý úshin, bul preparattarǵa shekti satyp alý baǵalaryn ózgertý týraly sheshim qabyldandy», - dep qosty Maksım Kasatkın.
Satyp alý baǵasyn arttyrý biryńǵaı dıstrıbıýtorǵa barlyq tenderlik rásimderdi qolaıly ótkizýge jáne dári-dármekti aýrýhanaǵa tamyz aıynda jetkizýdiń bastalýyn uıymdastyrýǵa múmkindik berdi.
Biryńǵaı dıstrıbıýtor basshysynyń aıtýynsha, dárilik qamtamasyzdandyrýdyń úzdiksizdigi úshin, zańnama jergilikti deńgeıde dári-dármekti eki aı kóleminde satyp alýǵa múmkindik beredi. Sondyqtan, mamyr aıynda preparattarǵa baǵalardyń ózgerýi bastalǵan sátten bastap, Biryńǵaı dıstrıbıýtormen jetkizýdiń jańarýyna deıin, naýqastardy emdeý úshin qajetti dári-dármek kólemi oblystyq densaýlyq saqtaý basqarmalarymen satyp alyndy.
Endi memleketpen kepildendirilgen tegin medıtsınalyq kómektiń kólemi sheńberinde qant dıabetimen emdelýshiler, biryńǵaı dıstrıbýtsııa júıesi arqyly jaqyn arada test-jolaqtar jáne Lantýs® - áseri uzartylǵan ınsýlın glargın preparatyn ala bastaıdy. Al shashyrandy sklerozy bar naýqastar úshin aýrýhanalarǵa kóp uzamaı Betaferon preparaty túsedi. Jyl sońyna deıin el aýrýhanalaryna 400 myń ınsýlın glargınimen shprıts-qalam jáne shamamen 30 myń betaferon qutylaryn jetkizý josparlanýda.
Esterińizge sala keteıik, 2017 jylǵy 31 mamyrda QR Dıabettik qaýymdastyǵy (QRDQ) qant dıabetimen aýyratyn naýqastarǵa tegin medıtsınalyq kómektiń kepildendirilgen kólemi sheńberinde ınsýlın glargınniń jetkizý problemasyna arnalǵan baspasóz máslıhatyn ótkizdi. Baspasóz máslıhatynyń ótkizilý sátinde-aq Biryńǵaı dıstrıbıýtormen preparatty qaıta qaralǵan baǵada satyp alý boıynsha baıqaý jarııalanǵan bolatyn.
