Qazaqstanda qant dıabeti men semizdikti emdeý joldary jetildiriledi

NUR-SULTAN. QazAqparat - Densaýlyq saqtaý mınıstrligi men farmatsevtıkalyq ónimderdiń jetekshi álemdik óndirýshisi «Novo Nordısk Qazaqstan» JShS áleýmettik máni bar ınfektsııalyq emes aýrýlardy emdeýdegi áriptestik máseleleri boıynsha ózara túsinistik týraly memorandýmǵa qol qoıdy.

​Danııalyq Novo Nordisk kompanııasy qurylǵannan beri qant dıabetin, semizdikti jáne basqa sozylmaly aýrýlardy emdeýge arnalǵan ınsýlın jáne «Ozempık», «Vıktoza» sııaqty birqatar dári-dármekterdi shyǵarýǵa mamandandyrylǵan.

Memorandýmǵa qol qoıý rásiminde mınıstr osy áriptestiktiń qant dıabetin qosa alǵanda, negizgi áleýmettik mańyzy bar ınfektsııalyq emes aýrýlardyń aldyn alý men basqarýdy jetildirý, sondaı-aq Qazaqstannyń farmatsevtıka salasyn odan ári damytý úshin mańyzyn atap ótti.

«Búgingi memorandým aıasynda qol jetkizilgen ýaǵdalastyqtar bizdiń densaýlyq saqtaý salasyndaǵy ekijaqty yntymaqtastyǵymyzǵa qosymsha serpin beredi dep úmittenemin», – dedi A.Ǵınııat.

​Óz kezeginde, TMD damýshy elderi óńiriniń,«Novo-Nordısk Qazaqstan « JShS bas menedjeri Alı Bengı josparlanǵan is-sharalardy tolyq jáne sapaly júzege asyrýda jan-jaqty qoldaý kórsetýge daıyn ekenin bildirdi.

Memorandýmǵa sáıkes taraptar eki jaqty yntymaqtastyqty birneshe baǵytta damytýdy kózdep otyr, atap aıtqanda:

- dárilik zattardyń otandyq óndirisin qoldaý jáne damytý;

- dıabet jáne semizdik salasynda úzdiksiz medıtsınalyq bilim berý boıynsha jobalardy iske asyrý arqyly sapaly medıtsınalyq kómek kórsetýdi jetildirý maqsatynda kadrlyq áleýetti nyǵaıtý;

- ǵylymı jáne zertteý áleýetin arttyrý;

- atalǵan toptardyń emdeýdiń ınnovatsııalyq ádisterine erterek qol jetkizýin qamtamasyz etý arqyly qant dıabeti jáne semizdikpen aýyratyn naýqastar úshin emdeý sapasyn arttyrý.

Mysaly, Novo Nordisk kompanııasy semizdiktiń aldyn alý jáne emdeý máselelerimen aınalysatyn qazaqstandyq mamandarǵa «Global obesity clinics programme» baǵdarlamasy boıynsha oqýǵa múmkindik beredi.

Sondaı-aq, kompanııa qazaqstandyq farmatsevtıkalyq kásiporyndardyń adam ınsýlıni preparattaryn óndirýdi odan ári jolǵa qoıýy úshin belsendi farmatsevtıkalyq sýbstantsııany qazaqstandyq naryqqa jetkizýdi júzege asyrý múmkindigin zerdeleýdi josparlap otyr.

Dúnıejúzilik dıabet federatsııasynyń (IDF) dereginshe, 2021 jyly qant dıabetiniń jahandyq taralýy 10,5% (573 mıllıon adam) qurady jáne 2030 jylǵa qaraı 11,3% - ǵa jáne 2045 jylǵa qaraı 12,2% (783 mln adam) deıin ulǵaıý boljanyp otyr.

Qazaqstanda «Qazaqstan Respýblıkasy úshin dıabettiń aýyrtpalyǵy» zertteýine sáıkes, osy aýrýmen aýyratyn naýqastardyń sany 383 myńdy quraıdy jáne turaqty túrde ósip otyr.

Foto: gov.kz