Qazaqstanda qansha jańartylatyn energııa obektisi jumys istep tur

ASTANA. KAZINFORM – Ótken jyly elimizde saǵatyna 7,581 mlrd kVt jańartylatyn energııa óndirildi. Bul týraly Energetıka vıtse-mınıstri Suńǵat Esimhanov málim etti.

- 2024 jyldyń qorytyndysy boıynsha elimizde jalpy qýaty 3 032 MVt bolatyn 153 jańartylatyn energııa obektisi jumys istedi. Qazir qýaty 3122 MVt bolatyn 156 obekti jumys istep tur. Bul elimizdegi jalpy elektr energııasy óndirisiniń 6,4% qamtamasyz etip otyr, - dedi Suńǵat Esimhanov ortalyq kommýnıkatsııalar qyzmeti alańynda ótken baspasóz máslıhatynda.

Mınıstrliktiń málimetine súıensek, 2024 jyly jańartylatyn energııa kózi obektileriniń jalpy elektr energııasyn óndirý kólemi saǵatyna 7,581 mlrd kVt boldy, onyń ishinde:

• Jel energetıkasy – saǵatyna 4 513 mlrd kVt;

• Kún energetıkasy – saǵatyna 1 889,6 mlrd kVt;

• Gıdroenergetıka – saǵatyna 1 177 mlrd kVt;

• Bıoenergetıka – saǵatyna 1,58 mlrd kVt.

Odan bólek, qazir qýaty 2 258 MVt bolatyn 91 joba iske asý satysynda tur:

• 20 jel elektr stansasy (1 364,5 MVt);

• 9 kún elektr stansasy (282,6 MVt);

• 58 shaǵyn sý elektr stansasy (591,81 MVt);

• 4 bıo-energetıkalyq joba (19,25 MVt).

Buǵan deıin Energetıka mınıstri Erlan Aqkenjenov Qytaı Qazaqstandaǵy jańartylatyn energetıka jobalaryna qyzyǵýshylyq tanytqanyn málimdegen edi.