Qazaqstanda qansha tonna kómir óndiriledi
ASTANA. KAZINFORM – Ónerkásip jáne qurylys mınıstri Ersaıyn Naǵaspaev ótken jylytý maýsymyn qorytyndylap, kómirmen úzdiksiz qamtý sharalary týraly aıtyp berdi.
− Ótken jyldyń qorytyndysy boıynsha, shamamen 110 mıllıon tonna kómir óndirildi. Onyń ishinde halyq pen kommýnaldyq-turmystyq sektor – 8,6 mıllıon tonna, energııa jáne jylý óndirýshi kásiporyndar – 66 mıllıon tonna, ónerkásip sektory – 6 mıllıon tonnamen qamtamasyz etildi. Eksportqa 30 mıllıon tonna kómir shyǵaryldy, − dedi Ersaıyn Naǵaspaev Úkimettiń búgingi otyrysynda.
Ótken jyldyń tórt aıynda 36,4 mıllıon tonna kómir óndirilse, bıylǵy 4 aıda óndiris kólemi 4,3 paıyzǵa artqan.
Mınıstrdiń aıtýynsha, ótken jyly jylytý maýsymynda kommýnaldyq-turmystyq sektor 7,9 mln tonna kómir tutynady dep josparlandy jáne barlyq tutynýshy tolyq kólemde kómirmen qamtylyp, jospar 101 paıyzǵa oryndalǵan.
− Respýblıkalyq shtabtyń «Qazaqstan temir joly», jergilikti atqarýshy organdarmen jáne kómir óndirýshilermen birlesken jumysy arqyly kómir turaqty jetkizildi. Qoımalar men temirjol tuıyqtarynda shamamen 350 myń tonna kómir qory bar. 2025-2026 jyldarǵa arnalǵan jylytý maýsymyna kómirdi úzdiksiz jetkizý jospary ázirlenip, jergilikti atqarýshy organdarǵa, QTJ jáne kómir kompanııalaryna joldandy, − dedi mınıstr.
Sonymen birge, kómirdi turaqty jetkizý úshin «Qaztemirtranspen» birlesip, kómir kompanııalaryn qajetti vagondarmen qamtamasyz etý úshin uzaq merzimdi kelisimshart jasalyp jatyr.
Aıta keteıik, elimizde bıyl energetıka salasynda birqatar qýat kózi iske qosylady. Onyń ishinde 9 obekt – jańartylatyn energııa kózderine jatady.