Qazaqstanda qansha soǵys ardageri qaldy jáne olar qandaı qoldaý alady
ASTANA. KAZINFORM — 2026 jyldyń mamyryna qaraı elde Ekinshi dúnıejúzilik soǵystyń nebári 57 ardageri qaldy. Bul — ómir joly maıdanmen jáne jeńispen tikeleı baılanysty jandar. Mundaı derekterdi Eńbek jáne halyqty áleýmettik qorǵaý mınıstrligi usyndy.
Búginde ardagerlerdiń ortasha jasy — 101 jas, eń úlkeni — 105 jasta. Olardyń qatarynda 43-i — soǵysqa qatysýshylar, al 14 adam — soǵys jyldarynda múgedektik alǵandar.
Ardagerler qaı óńirlerde turady
Vedomstvo málimetinshe, óńirler boıynsha bólinis kelesideı:
— Almaty qalasy — 14 ardager;
— Shyǵys Qazaqstan, Batys Qazaqstan jáne Qaraǵandy oblystary — árqaısysynda 6-dan;
— Almaty, Qostanaı jáne Pavlodar oblystary — árqaısysynda 4-ten;
— Jambyl jáne Túrkistan oblystary — 3-ten;
— Abaı, Jetisý, Aqmola, Aqtóbe, Qyzylorda, Mańǵystaý oblystary jáne Astana qalasy — 1-den.
Sonymen qatar soǵys jyldarymen taǵdyry baılanysty adamdar sany áldeqaıda kóp. Resmı derek boıynsha, Qazaqstanda Jeńiske úles qosqan 32 852 adam turady:
— tyl eńbekkerleri — 31 349 adam;
— soǵys múgedekteriniń qaıtys bolǵan jubaılary — 1 335;
— kámeletke tolmaǵan kontslager tutqyndary — 110;
— qorshaýda bolǵan Lenıngrad turǵyndary — 57;
— qaza tapqan maıdangerlerdiń jesirleri — 1 adam.
9 mamyrǵa qansha tólenedi
2026 jyly birjolǵy áleýmettik kómekke 3,4 mlrd teńge bólindi. Jalpy shamamen 32,9 myń adamǵa qoldaý kórsetiledi.
— soǵys ardagerlerine — árqaısysyna 5 mln teńgeden (el boıynsha biryńǵaı mólsher, tólemder tolyq júrgizilgen);
— qalǵan sanattarǵa — tólem kólemin óńirler jergilikti bıýdjetke qaraı ózderi belgileıdi (tólemder 9 mamyrǵa deıin aıaqtalady).
Aı saıynǵy tólemder
Memlekettik qoldaý turaqty túrde kórsetiledi jáne oǵan zeınetaqy, járdemaqylar men 16 AEK-ke deıingi (2026 jyly 69 200 teńge) arnaıy qosymsha tólem kiredi.
2026 jylǵy sáýirdegi ortasha jıyntyq tabys:
— soǵys qatysýshylary — 293 606 teńge;
— soǵys múgedekteri — 298 050 teńge;
— qatysýshylarǵa teńestirilgender — 228 509 teńge;
— múgedekterge teńestirilgender — 213 105 teńge;
— tyl eńbekkerleri — 203 207 teńge.
Qandaı jeńildikter saqtalǵan
Qarjylaı kómekten bólek, memleket ardagerlerge medıtsınalyq jáne áleýmettik ınfraqurylymǵa qoljetimdilikti qamtamasyz etedi. Olar Astana men Almatydaǵy arnaıy gospıtaldarda emdeledi, tegin sanatorıı-kýrorttyq em alýǵa quqyly, burynǵy jumys orny boıynsha emhanalarda qyzmet alýdy jalǵastyrady jáne áleýmettik qyzmetterdi basym tártippen alady. Sonymen qatar turǵyn úı jáne salyqtyq jeńildikter qarastyrylǵan.
Óńirlik deńgeıde de qosymsha qoldaý kórsetiledi: tegin jol júrý, turǵyn úıdi jóndeýge kómek, otynmen, dári-dármekpen jáne azyq-túlikpen qamtamasyz etý. Osylaısha, qoldaý júıesi jyl ótken saıyn naqty ári ataýly sıpat alyp keledi — sebebi ony alatyn jandar sany da azaıyp barady.
Buǵan deıin Qyzylorda oblysynda Jeńis kúnine oraı Ekinshi dúnıejúzilik soǵysqa qatysýshylarǵa beriletin birrettik tólem artqany belgili boldy. Sońǵy tórt jylda onyń kólemi 1,5 mln teńgeden 5 mln teńgege, al bıyl 5,5 mln teńgege óskenin jazǵanbyz.
