Qazaqstanda qansha shetel azamaty turyp jatyr
«Sońǵy 5 jyldyń ishinde (2017-2021 jj) 127 415 adam Qazaqstan azamattyǵyn alǵan. Onyń ishinde 7 731 QR Prezıdentiniń Jarlyǵyna sáıkes, 19 684 jeńildetilgen túrde jáne 106 052 etnıkalyq qandas. Sondaı-aq, sońǵy bes jyldyń ishinde elimizde 20 877 800 shetel azamaty boldy, onyń 1 539 417 alys shetelden kelse jáne 19 338 383 azamat TMD elderiniń azamattary. Odan bólek, atalǵan ýaqyt ishinde Qazaqstanǵa kelgen 395 755 shetel azamaty ákimshilik jaýapkershilikke tartylypty. Onyń qatarynda 18 683 alys elder azamaty bar, qalǵan 377 072 TMD azamaty. Búginde elimizde ІMM-niń statıstıkasyna sáıkes 137 702 shetel azamaty turaqty turyp jatyr. Sol sııaqty bıylǵy esep boıynsha 25 176 qandas turýda», - dedi Erlan Smaılov Májilistiń zańnama jáne sot-quqyqtyq reforma komıtetiniń otyrysynda jasaǵan baıandamasynda.
Sondaı-aq, Májilis depýtaty elimizdiń kóshi-qon týraly zańnamasyna ózgerister engizip, tolyqtyrýdyń mańyzdylyǵyna toqatalyp ótti.
«Qoldanystaǵy zańnamaǵa ózgerister men tolyqtyrýlar engizýdegi maqsat - normalardy QR Konstıtýtsııasyna sáıkes keltirip, adam quqyqtaryn qorǵaý men ulttyq jáne qoǵamdyq qaýipsizdik máselelerin sheshý. Qazaqstan Respýblıkasy azamattarynyń múddelerin qamtamasyz etý. Kóshi-qon salasyndaǵy memlekettik retteýdi jaqsartý. Jáne zańnamadaǵy quqyqtyq olqylyqtardy joıýdy kózdeıdi», - deıdi ol.
Aıta keteıik, búgin QR Parlamenti Májilisiniń zańnama jáne sot-quqyqtyq reforma komıtetinde QR keıbir zańnamalyq aktilerine halyqtyń kóshi-qony salasyndaǵy zańnamany jetildirý máseleleri boıynsha ózgerister men tolyqtyrýlar engizý týraly zań jobasynyń tanystyrylymy ótti.
Atalǵan sharaǵa Májilis depýtattarymen qatar quzyrly organ ókilderi qatysty.