Qazaqstanda qansha shetel azamaty jumys isteıtini anyqtaldy
ASTANA. KAZINFORM — 1 tamyzdaǵy jaǵdaı boıynsha jergilikti atqarýshy organdardyń ruqsatymen Qazaqstan aýmaǵynda 14 130 shetel azamaty eńbek etedi, dep habarlaıdy Eńbekmıni baspasóz qyzmeti.
Shetel jumys kúshin (budan ári — ShJK) tartýǵa ruqsattardyń arasynda mynadaı sanattar bar: basshylar men olardyń orynbasarlary úshin 549 ruqsat (birinshi sanat), qurylymdyq bólimshelerdiń basshylary úshin 2 258 ruqsat (ekinshi sanat). Tartylǵan ShJK negizgi bóligi úshinshi (mamandar) jáne tórtinshi (bilikti jumysshylar) sanattarǵa jatady — tıisinshe olar 3 786 jáne 904 adam. Sondaı-aq maýsymdyq jumystarǵa 2 889 adam, al korporatıvtik aýystyrý aıasynda 3 744 adam tartyldy.
Qazirgi ýaqytta Qazaqstanda ShJK paıdalanatyn 1 899 jumys berýshi bar. Olarda 348 myńnan astam Qazaqstan azamaty jumys isteıdi, bul qyzmetkerlerdiń jalpy sanynyń 96%-y.
Ekonomıkalyq qyzmet túrleri boıynsha eń kóp jumys isteıtinder: qurylys salasynda — 4 949 adam, aýyl, orman jáne balyq sharýashylyǵy — 2 930 adam, taý-ken ónerkásibi jáne karerlerdi qazý — 1 369 adam, óńdeý ónerkásibi — 1 210 adam.
Eńbek mıgranttary keletin negizgi elder: Qytaı — 5 120 adam, Ózbekstan — 2 478 adam, Túrkııa — 1 042 adam, Úndistan — 1 031 adam.
— Іshki eńbek naryǵyn qorǵaý maqsatynda QR Eńbek jáne halyqty áleýmettik qorǵaý mınıstrligi jyl saıyn respýblıkaǵa shetel mamandaryn tartýǵa kvota belgileıtinin jáne bóletinin esterińizge salamyz. 2025 jyly jalpy kvota respýblıkadaǵy jumys kúshiniń sanyna qatysty 0,2% mólsherinde nemese 14,8 myń birlik bolyp belgilengen, al osy jyldyń naýryz aıynan bastap jergilikti atqarýshy organdardyń ótinimderine baılanysty mınıstrdiń buıryǵymen 16,5 myń birlikke deıin ulǵaıtyldy, — delingen habarlamada.
Aǵymdaǵy jyldyń tamyz aıynan bastap maýsymdyq sheteldik jumysshylardyń eńbek qyzmetin júzege asyrý úshin kásipter tizbesiniń keńeıýine baılanysty mınıstrdiń buıryǵymen jalpy kvota respýblıkadaǵy jumys kúshi sanyna qatysty 0,25% nemese 19,4 myń birlik mólsherinde belgilendi.
Osydan buryn habarlanǵandaı, sheteldik azamatpen nekege turý úshin qandaı qujattar qajet ekeni aıtyldy.