Qazaqstanda qansha shaǵyn kásipker bar
«Sońǵy jyldary belsendi shaǵyn jáne orta bıznes sýbektileriniń jalpy sany ósip keledi. 2020 jylǵy 1 qazandaǵy jaǵdaı boıynsha olardyń sany 1 mln 300 myńnan asty, Bul óz kezeginde ońtaıly nátıje. Sonymen birge, otandyq ShOB Ekonomıkalyq yntymaqtastyq jáne damý uıymy elderindegi osy sektordan ózgesheleý bolyp tur. Bizde ázirge tehnologııalyq startaptar, óndirispen aınalysatyn eksporttaýshylar men shaǵyn jáne orta kásiporyndar jetkiliksiz», - dedi M. Áshimbaev Qazaqstanda shaǵyn jáne orta kásipkerlikti damytý salasyndaǵy memlekettik saıasatty jáne quqyqtyq retteýdi jetildirý taqyrybyndaǵy Parlamenttik tyńdaýda.
Onyń aıtýynsha, elimizdegi kásiporyndardyń negizgi qyzmeti retinde saýda salasy qalyp otyr. Bul baǵytta sýbektilerdiń úshten biri jáne ShOB salasynda jumyspen qamtylǵandardyń úshten biri qyzmet etip jatyr.
«Budan bólek, kásiporyndardyń eleýli úlesi tolyqtaı nemese ishinara kóleńkede jumys istep otyr. Ony moıyndaý kerek. Ekonomıkada shaǵyn jáne orta bıznes úlesin arttyrý úshin bul sektordy kóleńkeden shyǵaryp, onyń sapasyn arttyryp, ártaraptandyrý mańyzdy», - dedi Senat Tóraǵasy.