Qazaqstanda qansha shaǵyn jáne orta bıznes sýbektisi jumys istep tur
ASTANA. KAZINFORM – Shaǵyn jáne orta bıznestiń Qazaqstan ekonomıkasyndaǵy róli artyp keledi. Byltyrǵy jyldyń qorytyndysy boıynsha shaǵyn jáne orta bıznestiń JІÓ-degi úlesi 40,9%-ǵa jetip, sektorda ekonomıkada jumyspen qamtylǵan árbir tórtinshi adam eńbek etti. Bul týraly Ulttyq ekonomıka mınıstrligi Kazinform agenttiginiń resmı saýalyna bergen jaýabynda málimdedi.
– 2026 jylǵy 1 qańtardaǵy jaǵdaı boıynsha Qazaqstan Respýblıkasynda 2,36 mln ShOB sýbektisi tirkeldi, onyń 2,18 mıllıony jumys istep tur. ShOB-tyń jalpy ishki ónimge qosqan úlesi 40,9% qurady, ekonomıkada jumys isteıtin árbir tórtinshi adam osy sektorda eńbek qyzmetin júzege asyrady, – delingen qujatta.
Atap aıtqanda, 2020-2025 jyldary Qazaqstanda tirkelgen jáne jumys istep turǵan ShOB sýbektileriniń sany turaqty ósken. Tirkelgen sýbektiler sany 1,61 mln-nan 2,36 mln-ǵa deıin, al jumys istep turǵandary 1,36 mln-nan 2,18 mln-ǵa deıin ulǵaıdy. Turaqty ósý kásipkerlik bazanyń keńeıýin jáne is júzinde jumys isteıtin ShOB sýbektileri sanynyń ulǵaıýyn kórsetedi.
Vedomstvo bul kórsetkishter ShOB-tyń el ekonomıkasyndaǵy mańyzdy rólin kórsetetedi. Osyǵan baılanysty sektordy odan ári damytý úshin tıimdi memlekettik retteý sharalary qajet ekenin atap ótti.
Sonymen qatar Ulttyq ekonomıka mınıstrligi ShOB úlesiniń ósýin birneshe negizgi faktormen baılanystyrady.
– Birinshiden, ózin-ózi jumyspen qamtyǵandardyń mártebesin zańnamalyq turǵyda aıqyndaý jáne olardyń resmı sektorǵa ótýi yqpal etti. Ekinshiden, Kásipkerliktiń tsıfrlyq kartasy men elektrondyq úkimet platformalary arqyly tirkeý rásimderi jeńildetildi. Úshinshiden, baqylaý-qadaǵalaý júktemesin táýekelge negizdelgen tásilge kóshirý arqyly qysqartyldy, – dep túsindirdi mınıstrlik.
Aıta ketý kerek, tirkelgen ShOB sýbektileriniń basym bóligin shaǵyn kásipkerlik sýbektileri quraıdy – olardyń úlesi 99,9%. Orta kásiporyndardyń úlesi 0,1% boldy. Jalpy tirkelgen ShOB sýbektileriniń 92,1%-y jumys istep turǵan kásiporyndar.
Bul rette orta kásiporyndardyń belsendilik deńgeıi joǵary bolyp, 97,8%-ǵa jetti. Bul shaǵyn kásipkerlik sýbektileriniń belsendilik deńgeıinen 5,6 paıyzdyq tarmaqqa joǵary, dep atap ótilgen qujatta.
Buǵan deıin UEM Qazaqstan bıznesi úshin eń problemaly bes salany ataǵan edi.
