Qazaqstanda qansha resmı gıd bar
ALMATY. KAZINFORM - 2024 jyly 78 qazaqstandyq gıd ózderiniń kásibı daǵdylaryn rastap, tsıfrlyq tizilimge endi.
Kazakh tourism málimetine sáıkes, 2023 jyldan bastap gıdterge beıdjder beriledi. Bul beıdjder ár gıdtiń resmı mártebesin rastaıdy jáne toptar quramynda 41 týrıstik nysanǵa tegin nemese jeńildikpen kirýge múmkindik beredi. Ataýly beıdjge ıe bolý úshin gıdter guides.kazakhstan.travel saıtyna tirkelip, testileýge ótinim berýi qajet.
- Gıdter arnaıy kýrstarda oqytylady. Gıdtar tsıfrlyq tizilimge enýge jáne ataýly beıdj alýǵa ótinish bergen kezde mindetti túrde atalǵan kýrstarda tıisti bilim alǵany týraly qujattardy da joldaıdy. Testileý suraqtary gıdterdiń qyzmetine jáne ózi eńbek etetin óńirdiń erekshelikterine baılanysty. Eger testileýden sátti ótse, tsıfrlyq tizilimge engiziledi, - dep habarlady kompanııadan.
Búgingi kúni beıdjder sany boıynsha Almaty qalasynyń gıdteri kósh bastap tur - 49 adam. Elordada resmı mártebesi bar 15 maman, Almaty oblysynda 7 maman bar.
Shymkent qalasynyń, Shyǵys Qazaqstan jáne Jambyl oblystarynyń árqaısysynda eki gıd ataýly beıdj ıelendi. Al Túrkistan oblysynda bir adam tsıfrlyq tizilimge endi.
Árbir beıdj týrısterge gıd profılimen tanysýǵa múmkindik beretin QR kodpen jabdyqtalǵan.
- Gıdter sheteldik týrısterdiń Qazaqstan týraly pikirin qalyptastyrýda sheshýshi ról atqarady. Olardyń kásibıligi - týrızm ındýstrııasyn damytýdyń jáne qyzmet kórsetý standarttaryn arttyrýdyń mańyzdy quramdas bóligi. Ataýly beıdj týrısterge sapaly qyzmet kórsetiletinine senimdilik beretin senim sımvolyna aınalady, - dedi Kazakh Tourism basshysy Qaırat Sádýaqasov.
Eske salaıyq, buǵan deıin sheteldik týrısterge Qazaqstannyń qandaı óńirleri tartymdy ekenin jazǵanbyz.