Qazaqstanda qansha otbasy turǵyn úı jaǵdaıyn jaqsartty
«Halyq sany ósip keledi, jańa otbasylar qurylýda. Sondyqtan qazaqstandyqtardy qoljetimdi turǵyn úımen qamtamasyz etý máselesi – basty nazarda. Búgingi tańda osy máselelerdi sheshý júıeli túrde qolǵa alynǵan. Prezıdent «Syndarly qoǵamdyq dıalog - Qazaqstannyń turaqtylyǵy men órkendeýiniń negizi» atty Qazaqstan halqyna Joldaýynda biryńǵaı turǵyn úı saıasatyn iske asyrý basymdyǵyn belgilegen bolatyn. Memlekettiń turaqty jáne óte mańyzdy mindetterińniń biri - bul halyqty turǵyn úımen qamtamasyz etý jáne qolaıly ómir súrý jaǵdaıyn jaqsartý», - dedi mınıstr Parlament Májilisinde «Nurly jer» baǵdarlamasynyń júzege asyrylýyna arnalǵan Úkimet saǵatynda.
Onyń sózine qaraǵanda, 1991-2018 jyldary respýblıkada 1,3 mln azamat óz turǵyn úı jaǵdaıyn jaqsartty. Áleýmettik turǵyn úımen 160 myń otbasy qamtamasyz etildi, 63 myńnan astam úleskerdiń turǵyn úı máseleleri sheshildi.
Azamattar úshin turǵyn úıdiń qoljetimdiligin arttyrý maqsatynda 2017 jyldan bastap «Nurly jer» memlekettik turǵyn úı qurylysy baǵdarlamasy iske asyrylyp jatyr.
«Barlyǵy 2017-2018 jyldary qarjylandyrýdyń barlyq kózderinen 23,7 mln sharshy metrden astam turǵyn úı salyndy. 1,9 trln teńge ınvestıtsııa tartyldy. 214 myńnan astam azamat óz turǵyn úı jaǵdaıyn jaqsartty. 2018 jyly rekordtyq 12,5 mln sharshy metr turǵyn úı paıdalanýǵa berildi, osy oraıda bir turǵynǵa shaqqanda 0,68 sharshy metrdi qurady. Bul TMD elderiniń ishindegi eń joǵarǵy kórsetkish. «Nurly jer» baǵdarlamasynyń tıimdilik kórsetkishi bul 1 teńge memlekettik ınvestıtsııaǵa jyl saıyn 7 teńge jeke ınvestıtsııa tartylyp otyrǵandyǵy. 2018 jyly halyqtyń turǵyn úımen qamtamasyz etilýi 1 turǵynǵa shaqqanda 21,8 sharshy metr boldy», - dedi B. Atamqulov.
