Qazaqstanda qansha mınıstr jemqorlyǵy úshin sottaldy
Agenttik tóraǵasynyń orynbasary Oljas Bektenovtyń aıtýynsha, osy ýaqytqa deıin elimizde 2 Premer-Mınıstr, 22 mınıstr, agenttik tóraǵasy men olardyń orynbasary, 17 oblys pen qala ákimi, 11 ulttyq kompanııa basshysy, 8 general jemqorlyq úshin sottaldy.
"Degenmen sońǵy eki jyldyń ishinde sybaılas jemqorlyq áreketteriniń sany azaıyp keledi. Biz onyń bári jan-jaqty nasıxat jumystarymen tyǵyz baılanysty dep sanaımyz. Sosyn qoǵamdyq sana da ózgerip jatyr. 2016 jyldan beri anyqtalǵan jemqorlyq faktileriniń sany 23 protsentke azaıdy", - dedi O.Bektenov memlekettik qyzmettiń jańa formatyn qalyptastyrýǵa arnalǵan paneldik sessııada.
Aıta keteıik, búgingi jıynda agenttik basshylyǵy Sybaılas jemqorlyqqa qarsy is-qımyl ulttyq bıýrosyn ońtaılandyrýdyń nátıjesin de jarııalady. Oljas Bektenovtiń aıtýynsha, osy ýaqytqa deıin Sybaılas jemqorlyqqa qarsy is-qımyl ulttyq bıýrosynda 250-ge jýyq basshylyq qyzmeti qysqartyldy. Budan bólek, artyq qurylymdar ońtaılandyryldy. Sonyń esebinen shuǵyl tergeý qyzmeti kúsheıtildi.
«Buryn Ulttyq bıýroda basshylar men qyzmetkerlerdiń ara qatynasy 1:2, ıaǵnı bir bastyqtyń qol astynda eki adam bolsa, qazir atalǵan kórsetkish damyǵan memleketterdiń deńgeıi - 1:8-ge jetti. Sosyn quqyq qorǵaýshylardy ashyq konkýrs negizinde jumysqa qabyldaıtyn boldy.
Jalpy, Ulttyq bıýro boıynsha shamamen 1 mıllıard teńge únemdeldi. Osynyń nátıjesinde qyzmetkerlerdiń jalaqysy 2 eseden artyq ósti. Bul jerde prezıdenttik ósimaqy da bar. Oǵan taǵy únemdelgen qarjynyń ústemaqysy qosylady. Búginde Sybaılas jemqorlyqqa qarsy is-qımyl ulttyq bıýrosy eń joǵary jalaqy alatyn quqyq qorǵaý organy bolyp sanalady», - deıdi O.Bektenov.