Qazaqstanda qansha kómir qory bar

ASTANA. KAZINFORM – Qazaqstan kómir qory boıynsha álemde alǵashqy 10 eldiń qataryna kiredi. Bul týraly Ónerkásip jáne qurylys mınıstrligi Ónerkásip komıtetiniń kómir ónerkásibi basqarmasynyń basshysy Janat Igisinov málim etti.

- Búginde bizde 33 mlrd 600 mln tonna kómir qory bar. Bul geologııalyq barlaý kezinde anyqtalǵan. Qazaqstan kómir qory boıynsha álemde alǵashqy 10 eldiń qataryna kiredi. Qazirgi bizdiń maqsat – aldymen kommýnaldyq qajettilikti, sosyn halyqty, odan keıin óndiris oryndary men energetıkalyq keshendi kómirdi qamtý, - dedi Janat Igisinov elordada ótken VI kómir ónerkásibi forýmynda.

Onyń aıtýynsha, kómir tapshylyǵy máselesiniń aldyn alý úshin respýblıkalyq shtab bar, ol jumysyn qyrkúıekte bastaıdy.

- Kún saıyn jergilikti atqarýshy organdary, kómir óndirýshiler jáne Qazaqstan temir joly ókilderimen baılanystamyz. Qaı óńirde kómir jetpeı jatyr, oǵan ne sebep, kómir vagondary nege ketpeı jatyr? Dereý habar almasyp otyramyz, sońǵy jyldary bul másele jolǵa qoıyldy, - deıdi ol.

Aıta ketsek, elimizde ótken jyldyń tórt aıynda 36,4 mıllıon tonna kómir óndirilse, bıylǵy 4 aıda óndiris kólemi 4,3 paıyzǵa artqan. Ónerkásip jáne qurylys mınıstriniń aıtýynsha, ótken jyly jylytý maýsymynda kommýnaldyq-turmystyq sektor 7,9 mln tonna kómir tutynady dep josparlandy jáne barlyq tutynýshy tolyq kólemde kómirmen qamtylyp, jospar 101 paıyzǵa oryndalǵan.