Qazaqstanda qansha qar barysy bar

ASTANA. KAZINFORM – Elimizde qar barysynyń sany 90 jyldarmen salystyrǵanda 2 esege artty. Bul týraly Ortalyq kommýnıkatsııalar qyzmetindegi brıfıngte Ekologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıtetiniń tóraǵasy Danııar Turǵambaev aıtty.

- Táýelsizdik jyldary respýblıkadaǵy erekshe qorǵalatyn tabıǵı aýmaqtardy keńeıtý jáne qurý jumystary nátıjesinde olardyń alańy 869 myń gektardan 30,9 mln gektarǵa deıin ulǵaıdy. Elimizde bıo ártúrlilikti saqtap qalý boıynsha qabyldanǵan sharalardyń nátıjesinde, sırek kezdesetin jabaıy janýarlar popýlıatsııasy aıtarlyqtaı ósti.

Sonymen qatar qar barysynyń sanyn qaıta qalpyna keltirý boıynsha birqatar keshendi shara qabyldandy. Olardyń negizgi tirshilik etý ýchaskelerinde - 3,6 mln gektar aýmaǵynda erekshe qorǵalatyn tabıǵı aýmaqtar quryldy, - dedi komıtet basshysy.

Onyń dereginshe, qazirgi kezde qar barysy mekendeıtin jerlerdiń 70 paıyzǵa jýyǵy erekshe qorǵalatyn aýmaqtarmen qorǵalǵan.

- Esepke alý jáne monıtorıng júrgizýdiń zamanaýı ádisteri, fototuzaqtar men spýtnıktik telemetrııa belsendi qoldanylady. 11 barys spýtnıktik arnaıy moıyn qarǵysymen tańbalandy. Qar barystaryn qorǵaý jáne monıtorıng júrgizý boıynsha qabyldanǵan sharalardyń nátıjesinde, olardyń sany 90-shy jyldardaǵy eń tómengi deńgeıden eki esege artyp, 180 basqa deıin jetti, - dedi Danııar Turǵambaev.

Aıta keteıik, Jetisý oblysynyń turǵyndary jol boıynda qar barysyn kezdestirgen.