Qazaqstanda qansha gaz qory bar — Energetıka mınıstrligi jaýap berdi
ASTANA. KAZINFORM — Qazaqstandaǵy gazdyń boljamdy qory 3,6 trln tekshe metr dep baǵalanyp otyr. Bul týraly Úkimettegi brıfıng barysynda jýrnalısterdiń saýalyna jaýap bergen QR Energetıka vıtse-mınıstri Qaıyrhan Tutqyshbaev málim etti.
Jýrnalıster áleýmettik jelilerde taraǵan «Qazaqstandaǵy gaz qory azaıyp bara jatyr» degen aqparatqa qatysty suraq qoıdy.
Vıtse-mınıstrdiń aıtýynsha, sońǵy jyldary gaz óndirý kólemi men oǵan degen suranys qatar ósip keledi. Buǵan ınvestıtsııalyq jobalardyń iske asyrylýy, eldi mekenderdiń gazdandyrylýy jáne halyq sanynyń artýy áser etip jatyr.
— Qazirgi tańda gaz óndirisi men gazǵa degen suranys jyl saıyn ósip keledi. Sebebi bizde ınvestıtsııalyq jobalar iske asyrylýda jáne gazdandyrylǵan óńirler, halyq turǵyndar sany da ósip bara jatyr, — dedi ol.
Onyń aıtýynsha, QazaqGaz kompanııasy boıynsha barlaý jumystaryn júrgizý úshin 30 perspektıvaly ken orny aıqyndalǵan. Bul ýchaskelerde aldymen geologııalyq barlaý jumystary júrgizilip, qor anyqtalǵan jaǵdaıda óndirý kezeńine kóshiriledi.
Sonymen qatar vıtse-mınıstr jańa zań aıasynda QazaqGaz kompanııasyna gaz óndirý jobalary boıynsha basym quqyq berilgenin atap ótti.
— Gaz tapshylyǵynyń aldyn alý jáne ósip kele jatqan suranysty qamtamasyz etý maqsatynda jańa gaz kózderin izdeý boıynsha jumystardy jalǵastyryp jatyrmyz. Osyǵan baılanysty «QazMunaıGaz» jáne QazaqGaz ulttyq kompanııalarymen birlesip, jańa ken oryndaryn ıgerý úshin jańa kelisimsharttar jasasý baǵytynda jumys júrgizilip jatyr, — dedi Energetıka vıtse-mınıstri.
Jýrnalıstiń Qazaqstandaǵy gaz qory qansha jylǵa jetetini týraly naqtylaý suraǵyna vedomstvo ókili boljamdy kórsetkish retinde 3,6 trln tekshe metr kólemin atady.
Aıta keteıik, Oljas Bektenov gaz óńdeý zaýyttarynyń qurylysyn apta saıyn baqylaýdy tapsyrdy.
