Qazaqstanda qansha ǵalym eńbek etip júr

ASTANA. QazAqparat – Qazirgi tańda Qazaqstanda ǵylym salasynda eńbek etetin 22 myńnan astam maman bar. Mundaı derekter Ǵylym jáne joǵary bilim mınıstrliginiń QazAqparat tilshisiniń saýalyna joldaǵan jaýabynda keltirilgen.

«Búginde elimizde 22 456 ǵylymı kadr bar. Bul - ótken jylymen salystyrǵanda 839 adamǵa kóp. Zertteýshilerdiń 37 paıyzy ǵylymı jáne akademııalyq dárejege ıe. Atap aıtqanda, ǵylym doktory – 1 743, ǵylym kandıdaty – 3 945, fılosofııa doktory (PhD) – 2 460 jáne beıini boıynsha doktor – 96 adam. Sondaı-aq, zertteýshilerdiń 46 paıyzy nemese 10 327 adam – 40 jasqa deıingi jas ǵalymdar. Al, 31 paıyzy nemese 6 950 adam - 41-54 jastaǵylar bolsa, 23 paıyzy (5 179 adam) - 55 jastan asqan ǵalymdar», - dep jazylǵan redaktsııanyń saýalyna joldaǵan Ǵylym jáne joǵary bilim mınıstrliginiń jaýabynda.

Qosa ketsek, qazir ǵylymı dárejesi men ataǵy bar pedagogter jáne ǵylymı qyzmetkerlerge memlekettik bıýdjet esebinen tólenetin qosymsha aqy somasyn ulǵaıtý boıynsha jumys júrip jatyr.

Buǵan qosa, ǵalymdarǵa arnalǵan áleýmettik jeńildikter paketi ázirlenedi.