Qazaqstanda qansha Frantsııa azamattary júr

ASTANA. QazAqparat – Qazirgi kezde elimizdiń Frantsııadaǵy Elshiliginde jáne Strasbýrgtegi Bas konsýldyqta Qazaqstannyń 629 azamaty konsýldyq esepte tur. Bul týraly Senattyń jalpy otyrysynda depýtat Sovetbek Medebaev aıtty, dep habarlaıdy QazAqparat tilshisi.

Aıta keteıik, búgin Senat «Qazaqstan men Frantsııa arasyndaǵy qylmystyq ister boıynsha ózara quqyqtyq kómek týraly shartty ratıfıkatsııalaý týraly» Zańdy maquldady.

S. Medebaevtyń paıymynsha, atalǵan shartty ratıfıkatsııalaý eki eldiń qylmysqa qarsy kúres jónindegi ózara yntymaqtastyǵyn arttyrýǵa erekshe múmkindik beredi. Taraptar qylmystyq quqyq buzýshylyqtarǵa qatysty kez kelgen rásimderde bir-birine barynsha quqyqtyq kómek kórsetýdi mindetine alady. Al quqyqtyq kómek suraý salý arqyly júzege asyrylady.

«Qazirgi kezde Qazaqstan men Frantsııa arasyndaǵy ózara qarym-qatynas qarqyndy damyp keledi, sondyqtan osy Shartty ratıfıkatsııalaýdyń mańyzy zor. Búgingi tańda Qazaqstan Respýblıkasynyń Frantsııadaǵy Elshiliginde jáne Strasbýrgtegi Bas konsýldyqta Qazaqstannyń 629 azamaty konsýldyq esepte tur, onyń 149-y Frantsııada turaqty turýǵa qujattaryn resimdedi. Al Qazaqstan Respýblıkasynda 532 Frantsııa azamaty bar, onyń 84-iniń elimizde turýǵa yqtııarhaty tirkelgen, 448-i ýaqytsha esepte tur», - dedi senator.