Qazaqstanda qansha etnıkalyq nemis turady

Kezekti kezdesý QR Syrtqy ister mınıstriniń orynbasary Arman Isetovtyń jáne Germanııa Federaldyq úkimetiniń qonys aýdarýshylar jáne ulttyq azshylyqtar isteri jónindegi ýákili Bernd Fabrıtsıýstyń tóraǵalyǵymen ótti.

Komıssııa otyrysynyń kún tártibine bilim berý, nemis tilin qoldaý, mádenıet, ǵylym, jastar saıasaty, muraǵat isi sııaqty salalaryndaǵy yntymaqtastyq, sondaı-aq iskerlik baılanystardy damytý jáne vıza rejımin jeńildetý máseleleri engizildi.

Kelissózder barysynda qazaqstandyq nemisterdiń ulttyq biregeıligin qoldaýǵa baǵyttalǵan birlesken jobalardy iske asyrýǵa erekshe nazar aýdaryldy.

Taraptar Almatydaǵy Qazaq-Nemis ýnıversıtetiniń, L. N. Gýmılev atyndaǵy Eýrazııa ulttyq ýnıversıtetinde Nemis tili men mádenıeti ortalyǵynyń, Almaty energetıka jáne baılanys ýnıversıtetinde Anhalt qoldanbaly ǵylymdar ýnıversıteti fılıalynyń, Astanadaǵy Qazaq-Nemis ortalyǵynyń, Aqtaýdaǵy Qazaq-Nemis turaqty ınjenerııa ınstıtýtynyń, Respýblıkalyq akademııalyq nemis drama teatrynyń, nemistildi «Deutsche Allgemeine Zeitung» gazetiniń jáne basqa da qurylymdardyń eki el arasyndaǵy yntymaqtastyqty damytýǵa qosqan mańyzdy úlesin atap ótti.

— Qazaqstan etnıkalyq nemisterdi qoǵamdyq kelisimdi nyǵaıtýǵa, mádenı ártúrlilikti damytýǵa jáne halyqaralyq gýmanıtarlyq baılanystardy keńeıtýge aıtarlyqtaı úles qosatyn eldiń birtutas halqynyń ajyramas bóligi retinde qarastyrady, — dep atap ótti Syrtqy ister mınıstriniń orynbasary A.Isetov.

Isetov ártúrli ult ókilderiniń ortaq áleýmettik-mádenı keńistikte beıbit qatar ómir súrýi úshin qolaıly jaǵdaı jasaý Qazaqstan Úkimetiniń basty mindetteriniń biri ekenin aıtty.

Óz kezeginde, B.Fabrıtsıýs Germanııa Úkimeti Qazaqstanda turatyn etnıkalyq nemisterdi jan-jaqty qoldaýdy jalǵastyratynyn rastady.

— Qazaqstandaǵy etnıkalyq nemister «dostyq kópiri» retinde eki el arasyndaǵy yntymaqtastyqty damytýǵa aıtarlyqtaı úles qosady, al Germanııa úkimeti osy ózara is-qımyldy nyǵaıtýǵa baǵyttalǵan kúsh-jigerdi qoldaıdy, — dedi ol.

Taraptar Qazaqstandaǵy etnıkalyq nemisterdi keshendi qoldaý jónindegi sharalardy josparly túrde júzege asyrýdy jalǵastyrýǵa kelisti jáne bul mindetter kezdesýdiń qorytyndysy boıynsha qol qoıylǵan Kommıýnıkede bekitildi.

Qazaqstan Respýblıkasynda turatyn etnıkalyq nemister máseleleri jónindegi Úkimetaralyq komıssııa Qazaqstan Respýblıkasy Úkimeti men Germanııa Federatıvtik Respýblıkasy Úkimeti arasyndaǵy Qazaqstan Respýblıkasy azamattarynyń nemis ultyn qoldaý jónindegi yntymaqtastyq týraly 1996 jylǵy 31 mamyrda Almaty qalasynda qol qoıylǵan kelisimge sáıkes qurylǵan.

Aıta keteıik, búgingi tańda Qazaqstanda 226 myń etnıkalyq nemis, al Germanııada Qazaqstannan qonys aýdarǵan shamamen 1 mıllıon nemis turady.

Osydan buryn byltyr nemister úısizderge kómektesý úshin rekordtyq soma jınaǵanyn jazdyq.