Qazaqstanda qansha bala úıirme men sektsııalarǵa barady
Qazaqstanda 3 mıllıonnan astam balany qamtıtyn qosymsha bilim berý júıesi belsendi damyp keledi. Jalpy 24 390 pedagog úıirmeler men sektsııalardyń 380 túri boıynsha sabaq beredi, dep habarlaıdy Kazinform.
Oqý-aǵartý vıtse-mınıstri Edil Ospannyń aıtýynsha, 2025 jylǵa qaraı mektep sport sektsııalarynda balalardy qamtý sanyn 50% deıin jetkizý josparlanyp otyr.
«Oqýshylardyń 3 mıllıonnan astamy nemese 81% qosymsha bilimmen qamtylǵan, bul balaǵa ónerge, sportqa, mýzykaǵa nemese ǵylymǵa degen qyzyǵýshylyqty arttyrýǵa, shyǵarmashylyq qabiletterin damytýǵa, qosymsha bilim, bilik jáne daǵdylardy ıgerýge múmkindik beredi. Prezıdent tapsyrmasymen balalardy saýyqtyratyn 50 ortalyq ashylyp jatyr, 37 oqýshylar saraıy men 63 óner mektebi salynýda», – dedi Edil Ospan Ortalyq kommýnıkatsııalar qyzmetinde ótken brıfıngte.
Bıyl aýyl mektepterinde mektepten tys qosymsha bilim berý boıynsha 300 ortalyq ashyldy. 2025 jylǵa deıin dál osyndaı 1000 ortalyq ashylady.
«Sonymen birge erekshe qajettiligi bar 188 myń bala úshin psıhologııalyq-pedagogıkalyq túzetý kabınetteriniń sany 210-ǵa deıin artty. Psıhologııalyq-medıtsınalyq-pedagogıkalyq konsýltatsııalar sany 89-ǵa jetti. 2029 jylǵa qaraı taǵy 34 konsýltatsııa, 26 túzetý kabıneti, 200 ınklıýzııany qoldaý kabınetin ashý josparlanǵan. Búgingi kúni 10 memlekettik ortalyq jáne 640 ınklıýzıvti qoldaý kabıneti aýtızmi bar balalarǵa belsendi túrde kómek kórsetýde», – dedi Oqý-aǵartý vıtse-mınıstri.
Aıta keteıik, jyl saıyn 20 qarashada álem qaýymdastyǵy BUU Bas Assambleıasynyń usynysymen Dúnıejúzilik balalardy qorǵaý kúnin atap ótedi. Qazirgi ýaqytta halqymyzdyń úshten birinen astamy – balalar.
