Qazaqstanda qansha bala qaraýsyz qalyp, abaısyzda ajal qushty
NUR-SULTAN. QazAqparat – Bıyl 118 bala jol apatynan kóz jumsa, 123 bala sýǵa batyp ketken. 108 bala ózine qol jumsap qaıtys boldy, dep habarlaıdy QazAqparat Іshki ister mınıstrliginiń baspasóz qyzmetine silteme jasap.
Balalar men jasóspirimderdiń jaraqattanýyna jáne qazasyna ákep soqtyratyn ártúrli tótenshe jaǵdaılarǵa kóbinde eresekterdiń nemquraıdylyǵy men jaýapsyzdyǵy sebep bolady.
20 tamyzda Shyǵys Qazaqstan oblysynyń Sredıgornoe aýylynda 2 jasar bala joǵalyp ketti. Úsh kúnnen keıin balanyń denesi aýladaǵy qudyqtan tabyldy. 26 tamyz kúni Aqtóbe oblysynyń Badamsha aýylynda jergilikti turǵyndar ózenge batyp ketken 4 jasar balanyń denesin alyp shyqty. Jalpy, jyl basynan beri sý aıdyndarynda 123 bala sýǵa batyp, 119 bala qutqarylǵan.
Sondaı-aq, bıyl 118 bala jol apatynan qaza taýyp, 2 275 bala jaraqat aldy.
«Jol-kólik oqıǵasynda zardap shekpes úshin jol júrý erejelerin balalardyń esine salyp, olardy jolda jáne qoǵamdyq kólikte barynsha saq bolýǵa úıretińiz. Avtokólikpen júrgende balalar úshin qaýipsizdik belbeýi jáne balalar kreslosy týraly umytpańyz. Onyń ústine jańa oqý jylynyń bastalýymen jol-kólik oqıǵalarynyń týyndaý qaýpi aıtarlyqtaı artady. Jolda júrý daǵdylaryn qalyptastyrýdyń negizgi tásili – qadaǵalaý jasaý, úlkenderdiń ózderi jol erejesin saqtap úlgi bolýy kerek» deıdi ІІM baspasóz qyzmeti.
Іshki ister mınıstrligi azamattardy balalaryn úıde jalǵyz qaldyrmaýǵa shaqyrady. Kúni keshe ǵana Nur-Sultan qalasynda 4-qabattyń terezesindegi tormen oınap otyrǵan 8 jasar qyz ben sińlisi qulap ketip, aýyr halde aýrýhanaǵa jatqyzyldy.
Sonymen qatar, bıyl 312 jasóspirim ózine qol jumsap, onyń 108-i ólimmen aıaqtaldy. Odan bólek, turǵyn úı sektoryndaǵy órt kezinde 16 bala qaza bolǵan.
«Balalardyń túngi ýaqytta eresekterdiń qadaǵalaýynsyz kóshede júrýine jol bermeńiz. Kámeletke tolmaǵandardyń túngi ýaqytta oıyn-saýyq mekemelerinde nemese turǵyn úıden tys jerde zańdy ókilinsiz júrgeni úshin bıyl 40 myńnan astam ata-ana ákimshilik jaýapkershilikke tartyldy. Balalardyń bos ýaqytyn qatań baqylaý kerektigin umytpańyz» dep keńes beredi mınıstrlik.
