Qazaqstanda qansha azamat bankrottyq tetigin qoldanbaı júr
ASTANA. KAZINFORM – Qazaqstanda jeke tulǵalardyń bankrottyǵy týraly zań aıasynda ázirge 70 myń adam osy tetikti paıdalanǵan. Bul týraly Qarjy naryǵyn retteý jáne damytý agenttiginiń tóraǵasy Mádına Ábilqasymova málim etti.
Vedomstvo dereginshe, qazirgi ýaqytta tólem merzimi 2 jyldan 5 jyldan astam ýaqytqa keshiktirilgen 500 myńnan astam azamat bólip tóleý rejıminde júr. Atalǵan sanattaǵy azamattardyń zań boıynsha bankrottyq rásimin qoldanýǵa múmkindigi bar, alaıda olardyń basym bóligi bul tetikke júginbeıdi.
Mádına Ábilqasymova muny zańdaǵy birqatar shekteýlermen baılanystyrady. Atap aıtqanda, bankrot dep tanylǵan azamattarǵa 5 jyl ishinde jańa nesıe alýǵa tyıym salynady.
Sonymen qatar sottan tys bankrottyq rásimine júginý úshin qaryz alýshynyń múlki bolmaýy jáne tabysy eki eń tómengi jalaqydan aspaýy tıis. Kóp jaǵdaıda azamattar bul talaptarǵa sáıkes kelmeıdi.
– Osyǵan baılanysty ótken jyly zańnamaǵa ózgerister engizilip, jańa norma qarastyryldy. Endi eger qaryz boıynsha tólem merzimi 5 jyldan assa, onda azamattar úshin múliktiń bolýy nemese tabys deńgeıine qatysty talaptar qoldanylmaıdy, – dedi agenttik tóraǵasy.
Sonymen qatar ol óz sózinde tólem merzimi 5 jyldan asqan jaǵdaıda azamat bankrottyq rásimine erkin túrde ótinish berip, tabysy men múlki tekserilmesten qaryzy esepten shyǵarylýy múmkin.
– Byltyr proaktıvti bankrottyq tetigi engizildi. Ony iske asyrý Qazaqstan Respýblıkasynyń Qarjy mınıstrligine júktelgen. Atalǵan mehanızm aıasynda bankrottyqqa ótinish berýge quqyǵy bar azamattardy avtomatty túrde anyqtap, olarǵa SMS-habarlama jiberý arqyly qaryzdy esepten shyǵarý múmkindigi usynylady, – dep tolyqtyrdy.
Soǵan qaramastan, bul tetikti paıdalanýshylar sany áli de az bolyp otyr.
Buǵan deıin byltyr Qazaqstanda nesıe berý talaptarynyń kúsheıýi tutynýshylyq kredıtterdiń qarqynyn aıtarlyqtaı tómendegenin jazǵanbyz.
