Qazaqstanda qansha avtokólik bar
NUR-SULTAN. QazAqparat –Qazaqstanda qansha avtokólik bar ekendigi belgili boldy, dep habarlaıdy QazAqparat.
Qazaqstan avtobıznes qaýymdastyǵynyń habarlaýynsha, elimizde barlyq tıptegi 4 566 198 kólik pen tirkeme bar. Olardyń 3 755 890 danasy nemese 82,2 paıyzy jeńil avtokólikter. 446 475 aýyr júk kólikteri bolsa, 241 259 tirkeme men jartylaı tirkeme, 63 058 mototehnıka men 59 516 avtobýs bar. Kóbinese avtokólikter eldiń ońtústik-shyǵysynda shoǵyrlanǵan.
«Jalpy, kólikter men tirkemelerdiń qoldanystaǵy jyly 20 jyldan asyp ketken (2 485 161). 10 men 20 jyl aralyǵyndaǵy kólikterdiń sany 959 263. Sonymen birge, 1 mıllıonǵa tarta kóliktiń jasy 3 pen 10 jyl aralyǵynda. Úsh jylǵa deıingi kólikterdiń sany 176 661 avto», - delingen habarlamada.
Kólik markalary boıynsha Qazaqstanda eń kóp kólikterdiń kóshin VAZ/Lada (757 960 dana) bastap tur. Atalǵan kólikterdi paıdalanǵanyna 20 jyldan astam ýaqyt ótip ketken. Al ekinshi oryndaǵy Toyota markaly kólikterdiń sany 487 453 avto. Sondaı-aq, táýelsizdik alǵaly beri Qazaqstanǵa Germanııadan mıllıonǵa tarta kólik jetkizilgen. Eń kóp kezdesetin nemis brendi Volkswagen. Atalǵan marka boıynsha Qazaqstanda 294 myń kólik bar.
Odan keıingi oryndarda Audi – 224 myń avto men Mercedes-Benz (190 myń) ornalasqan.
