Qazaqstanda qansha ateıst bar
ASTANA. QazAqparat - Dinı qyzmet jáne dinı birlestikter týraly zańnamaǵa ateısterdi qorǵaý talaby da engizilmekshi. Al dinı dogmalardy saqtamaǵany úshin adamǵa qysym jasaıtyndar zań aldynda jaýap beredi, dep xabarlaıdy QazAqparat tilshisi.
"Búginde Qazaqstan azamattarynyń 12 paıyzy ózderin ateıst nemese agnostık dep sanaıdy. Olardyń da quqyqtary qorǵalýy qajet. Dinge senetin adamdar zańmen qalaı qorǵalsa, dinge senbeıtinder úshin de sondaı jaǵdaı jasalýy shart. Sol sebepti Birikken Ulttar Uıymynyń ustanymyna sáıkes, din qyzmeti men dinı birlestikter týraly zańǵa tıisti ózgerister qarastyrylǵan. Sonyń ishinde dinı dogmalardy tolyqqandy saqtamaǵany úshin bireýge qysym jasalsa, ondaı adamdar zańmen qorǵalady. Áıtpese, qazirgi kezde dinı rásimderdi saqtamaıtyndarǵa qysym jasaý áreketteri jıilep ketti", - deıdi mınıstr Ermekbaev.
Onyń aıtýynsha, adamnyń dinı ustanymyna qysym jasaý áreketteri qaıǵyly oqıǵamen de aıaqtalyp jatady. "Máselen, Ońtústik Qazaqstan oblysynda er adam dinı kózqarasyna baılanysty óz áıelin óltirse, Almaty oblysynda taǵy bir erkek áıelin xıdjab kımegeni úshin jazalady. Mine, osy ispetti oqıǵalarǵa jol bermeý kerek", - dep atap kórsetti mınıstr.
Aıta keteıik , QR Syrtqy ister mınıstrliginde ótken baspasóz máslıxatynda QR Din isteri jáne azamattyq qoǵam mınıstri Nurlan Ermekbaev elshiler úshin arnaıy baspasóz máslıxatyn ótkizdi. Mınıstr dinı qyzmet jáne dinı birlestikterge arnalǵan zańnamaǵa qandaı ózgeristerdiń engiziletinin keńinen aıtyp berdi. Onyń aıtýynsha, memlekettik qyzmetshilerdiń dinı ustanymyna qatysty naqty úsh shekteý bolady. Budan bólek, mınıstr adamnyń bet-álpetin tumshalaıtyn kıimderge qatysty túsinik berdi .
