Qazaqstanda qansha áskerı azamat bala kútimi boıynsha dekretke shyqty
ASTANA. KAZINFORM — Áskerı qyzmetkerler úshin «dekrettik» dep atalatyn demalys sharttary qaıta qaraýdy qajet etedi. Mundaı pikirdi Májilistiń Halyqaralyq ister, qorǵanys jáne qaýipsizdik komıtetiniń tóraǵasy Aıgúl Quspan Jibek Joly telearnasyndaǵy «Ýáde» baǵdarlamasynda bildirdi.
Búgingi kúni Qazaqstanda 992 er azamat - áskerı qyzmetker bala kútimi boıynsha demalysta otyr. Depýtattyń aıtýynsha, er azamattar balalary úsh jasqa tolǵanǵa deıin demalysqa shyǵý quqyǵyna ıe.
— Mundaı tájirıbe 2014 jyly bastaldy. Sol kezde alǵash ret úsh áskerı qyzmetker — eki ofıtser men bir serjant dekretke shyqqan. Qazir olardyń sany 992-ge jetti. Bul bala kútimi boıynsha demalysqa shyǵatyn er áskerı qyzmetkerlerdiń sany turaqty kóbeıip kele jatqanyn kórsetedi, — dedi Aıgúl Quspan.
Onyń málimdeýinshe, dekrettegi qyzmetkerlerdiń 70 paıyzy — qatardaǵy jaýyngerler men serjanttar, al 30 paıyzy — ofıtserler.
— Bul máseleni kóbine Qorǵanys mınıstrligi kóterip otyr. Mınıstrlik ókilderi dekretke shyǵatyn qyzmetkerler sanynyń ósýi armııanyń jaýyngerlik qabileti men daıyndyq deńgeıine áser etýi múmkin dep esepteıdi. Jaýyngerlik daıyndyq degenimiz — armııanyń qoıylǵan mindetterdi belgilengen merzimde, múmkindiginshe qysqa ýaqytta oryndaý qabileti, — dedi depýtat.
Er azamattar demalysqa ártúrli sebeppen shyǵady — otbasylyq, qarjylyq jáne basqa da jaǵdaılarǵa baılanysty. Bala kútimi boıynsha demalys qyzmet ótiline qosylady, zeınetaqy esepterine esepteledi, turǵyn úı jeńildikterin alýǵa jáne áskerı ataq alýyna múmkindik beredi. Bul demalysty materıaldyq jáne mansaptyq turǵydan tartymdy etedi.
Aıgúl Quspan áskerı qyzmetkerler úshin bala kútimi boıynsha uzaq merzimdi demalys sharttaryn qaıta qaraý qajettigin erekshe atap ótti.
Buǵan deıin biz Qorǵanys mınıstrliginiń áskerge shaqyrý tártibi men oǵan qatysty zańsyzdyqtar jóninde jasaǵan eskertýleri týraly jazǵan edik.