Qazaqstanda qansha AQSh kompanııasy jumys istep tur

ASTANA. QazAqparat – Saýda jáne ıntegratsııa mınıstrligi Qazaqstan men AQSh arasyndaǵy saýda-sattyq pen ınvestıtsııalyq áriptestik týraly aqparat jarııalady, dep habarlaıdy QazAqparat tilshisi.

«Qazaqstan Respýblıkasy men AQSh arasyndaǵy qarym-qatynas ózara túsinistik pen senim atmosferasynda damyp jatyr. Muny barlyq deńgeıdegi baılanystyń oń dınamıkasy rastaıdy», - delingen mınıstrlik málimetinde.

Mınıstrlik deregine súıensek, Qazaqstanda AQSh zańdy tulǵalarynyń qatysýymen 688 kompanııa jumys isteıdi.

Onyń 666-sy shaǵyn, 13-i orta, 9-y iri kásiporyn.

Qańtar aıynda eki eldiń arasyndaǵy saýda aınalymynyń kólemi 201,4 mln dollarǵa jetken. Onyń 23,7 mln dollary - eksport bolsa, 177,7 mln dollary - ımport.

Degenmen bul 2022 jyldyń qańtarymen salystyrǵanda aıtarlyqtaı tómen.

2022 jylǵy qańtar-qyrkúıekte AQSh-tan Qazaqstanǵa tartylǵan tikeleı sheteldik ınvestıtsııa aǵyny 5 mlrd dollar bolǵan.

2022 jyly Qazaqstannan AQSh-qa jasalǵan eksport kólemi 1,2 mlrd dollar nemese 32,1% ulǵaıǵan.

Al ımport 1,9 mlrd dollar bolyp, 2021 jylmen salystyrǵanda 40,5% ósken.

Byltyr qańtarda AQSh-qa 30,2 mln dollardyń eksporty jasalyp, 226,6 mln dollardyń ımporty Qazaqstanǵa ákelingen bolatyn.

Qazaqstannan AQSh-qa eksporttalǵan negizgi taýarlar: shıki munaı – 558,1 mln dollar (úlesi 48,4%), ferroqorytpalar – 435,8 mln dollar (37,8%), sýtegi, ınertti gazdar jáne ózge de beımetaldar – 28 mln dollar (2,4%), qara metaldardan jasalǵan qubyrlar, tútikter jáne jiksiz profılder – 22,8 mln dolar (2%), tantal jáne odan jasalǵan buıymdar – 22,5 mln dollar (2%), kúkirt – 221 mln dollar (1,8%), ýran – 9,7 mln dollar (0,84%), qorǵasyn – 8,6 mln dollar (0,74%), bıdaı glıýteni - 7,2 mln dollar (0,62%).