Qazaqstanda qansha adam sportpen turaqty shuǵyldanady

ASTANA. KAZINFORM – Qazaqstanda 8 mıllıonan astam adam turaqty túrde sportpen shuǵyldanady. Bul týraly búgin QR Týrızm jáne sport mınıstrligi málim etti.

Mınıstrliktiń habarlaýynsha, Qazaqstanda jyl saıyn tamyz aıynyń úshinshi jeksenbisinde Sport kúni atalyp ótiledi. Elimizde 4 olımpıadalyq daıarlyq ortalyǵy jáne 19 olımpıadalyq rezervti daıyndaý ortalyǵy bar. Búginde 8 mln-nan astam qazaqstandyq turaqty túrde sportpen shuǵyldanady. Bul jalpy halyqtyń 40,4%-yna teń, onyń 3 mln-nan astamy aýyl turǵyndary. 300 myńǵa jýyq bala men jasóspirim 780-nen astam balalar men jasóspirimder dene shynyqtyrý klýbtarynda sportpen aınalysady.

Respýblıkada jyl saıyn ártúrli deńgeıde 25 myńnan asa sporttyq-buqaralyq is-shara turaqty túrde ótkiziledi. Oǵan 1,2 mln adam tartylady. Aýyldyq jerlerde turatyn 500 myń adam da atalǵan is-sharalardan syrt qalmaıdy. Ásirese, keıingi jyldary júgirý, marafon, velosherý men velomarafon, sporttyq festıval sekildi jarystar men otbasylyq is-sharalar halyq arasynda keń tanyla bastady.

2024 jyldyń birinshi jartyjyldyǵynda Qazaqstan quramasy 365 respýblıkalyq jáne shet elderdegi 419 halyqaralyq jarystarǵa qatysty. 2024 jyldyń birinshi jartyjyldyǵynyń qorytyndysy boıynsha sportshylarymyz álem, Azııa chempıonattarynda jáne halyqaralyq týrnırlerde 482 medal jeńip aldy. Onyń 179-y – altyn, 146-sy – kúmis jáne 157-si – qola medal.