Qazaqstanda qansha adam ómir boıyna túrmede otyr
ASTANA. KAZINFORM — Qazaqstanda ómir boıyna sottalǵandar shartty túrde merziminen buryn bosatylmaıdy, ári is júzinde mundaı jaǵdaılar múldem tirkelmegen. Bul týraly QR Іshki ister mınıstrligine qarasty Qylmystyq-atqarý júıesi komıtetinen habarlandy.
Vedomstvonyń málimetinshe, ómir boıyna bas bostandyǵynan aıyrý jazasyn óteýge arnalǵan mekemede 200-den astam sottalǵan azamat bar. Onyń arasynda áıelder joq, al segiz adam — shetel azamaty.
Sot statıstıkasynyń málimetine sáıkes, 2023 jyly ómir boıyna bas bostandyǵynan aıyrý jazasyn 190-ǵa jýyq adam ótep kelgen. 2024 jáne 2025 jyldary bul kórsetkish 200-den astam adamǵa jetti.
Sottalǵandardyń basym bóligi asa aýyr qylmystar, sonyń ishinde: kisi óltirý, zorlaý, qatygezdikpen kisi óltirý, sondaı-aq kámeletke tolmaǵandardy jynystyq zorlaý syndy óreskel áreket jasaǵan.
Qylmystyq-atqarý júıesi komıteti zańnamaǵa sáıkes, ómir boıyna sottalǵandardy merziminen buryn bosatý kózdelmegenin basa aıtty.
— Bul sanattaǵy sottalǵandardy shartty túrde merziminen buryn bosatý jaǵdaılary tájirıbede kezdespegen, — dep habarlady komıtette.
Buǵan deıin Іshki ister mınıstrligi qylmystyq jaýapkershilikten kimder bosatylmaıtynyn atap ótken edi.
Aıaýlym Qanatqyzy
