Qazaqstanda qansha adam koronavırýs juqtyrýy múmkin

NUR-SULTAN. QazAqparat – Elimizde naýryz, sáýir, mamyr aılarynda koronavırýs juqtyrǵandar sany 3500-nan aspaýy múmkin. Bul týraly eldegi koronavırýs ınfektsııasy boıynsha aǵymdaǵy jaǵdaı jaıly onlaın brıfıngte aıtyldy, dep habarlaıdy QazAqparat tilshisi.

«Koronavırýsqa qatysty boljam jasaý óte qıyn, sebebi ol kóptegen faktorǵa baılanysty. Eń bastysy – karantın sharalaryn saqtaý kerek. Koronavırýspen aýyrǵan adam ony taǵy 3-4 adamǵa juqtyrýy múmkin, sol sebepti teorııalyq turǵyda halyqtyń basym bóligi aýrý juqtyrýy múmkin. Biraq qabyldaǵan karantın sharasy bul qaýipti 50%-ǵa azaıtty. Qazirgi qabyldanyp jatqan sharalar boljamdarǵa áser etedi», - deıdi QR Densaýlyq saqtaý mınıstri Eljan Birtanov.

Onyń aıtýynsha, jalpy alǵanda naýryz, sáýir, mamyr aılarynda elimizde koronavırýs juqtyrǵandar sany 3500-den aspaıdy.

«Biz osy boljam negizinde sheshim qabyldaımyz, ıaǵnı osynshama adamǵa arnalǵan tósek-oryn daıyndaldy. Qosymsha tósek-oryn da bar. Osy sanǵa sáıkes dári-dármek daıyn turady. Sáýir aıynda epıdemııanyń sharyqtaý sheginen ótemiz, ary qaraı ınfektsııa tasymaldaýshylar sanyn azaıtý maqsatynda karantın sharalaryn jalǵastyra beremiz», - deıdi Eljan Birtanov.