Qazaqstanda qansha adam belsendi túrde sportpen shuǵyldanady

NUR-SULTAN. QazAqparat – Respýblıkanyń dene shynyqtyrý-sport qozǵalysyna 5,9 mln adam qatysty. Bul týraly QR Mádenıet jáne sport vıtse-mınıstri Erlan Qojaǵapanov málim etti, dep habarlaıdy QazAqparat tilshisi.

«Prezıdent Qasym-Jomart Toqaev 2020 jylǵy 1 qyrkúıektegi «Jańa jaǵdaıdaǵy Qazaqstan: is-qımyl ýaqyty» atty Qazaqstan halqyna Joldaýynda buqaralyq sportty damytýdyń mańyzdylyǵyn atap ótti. Osy maqsatta strategııalyq josparǵa sáıkes, mınıstrlik buqaralyq sportty odan ári damytý boıynsha jumys júrgizýde. 2020 jyldyń qorytyndysy boıynsha halyqty dene shynyqtyrýmen jáne sportpen qamtý 31,6% qamtamasyz etildi, bul respýblıkanyń dene shynyqtyrý-sport qozǵalysyna 5,9 mln adamnyń qatysatynyn kýálandyrady», - dedi E. Qojaǵapanov Májilistiń Áleýmettik-mádenı damý komıtetiniń keńeıtilgen otyrsynda.

Onyń aıtýynsha, salaýatty ómir saltyn nasıhattaý aıasynda 2020 jyly respýblıka boıynsha 1,5 mln-nan astam adamdy qamtı otyryp, 21 myńnan astam sporttyq-buqaralyq is-shara ótkizildi. Buqaralyq sportty damytýdaǵy baǵyttardyń biri mektep jáne stýdentter lıgalaryn ótkizý arqyly damıtyn mektep jáne stýdenttik sport bolyp otyr.

Budan buryn habarlanǵandaı, búgingi otyrys barysynda buqaralyq sport óńirlerdegi kóptegen azamat úshin áli de qoljetimdi emes ekeni aıtyldy.