Qazaqstanda qandaı júrgizýshiler kún saıyn medıtsınalyq tekserýden ótýge mindetti
ASTANA. KAZINFORM — Jeke kompanııalardyń qyzmettik kóligin júrgizetin azamattardyń bári birdeı kún saıyn reıs aldyndaǵy medıtsınalyq tekserýden ótýge mindetti emes. Bul talap qandaı jaǵdaıda qoldanylady jáne jol polıtsııasy jol paraǵynda medıtsına qyzmetkeriniń belgisi bolmaǵany úshin aıyppul sala ala ma? Bul suraqtarǵa zańgerlik keńesshi Arys Danagatov Kazinform tilshisine túsindirdi.
Zańgerdiń aıtýynsha, reıs aldyndaǵy jáne reısten keıingi medıtsınalyq tekserýden ótkizý mindeti avtomobılmen tasymaldaý qyzmetin júzege asyratyn uıymdar men kásipkerlerge júkteledi.
Buǵan jolaýshylar men bagajdy turaqty jáne turaqty emes baǵyttar boıynsha tasymaldaý, sonyń ishinde avtobýs, shaǵyn avtobýs jáne taksı qyzmeti, sondaı-aq júk tasymaly kiredi. Mundaı talaptar jolaýshylar men bagajdy avtomobıl kóligimen tasymaldaý qaǵıdalarynda jáne avtomobıl kóligimen júk tasymaldaý qaǵıdalarynda kózdelgen.
— Tasymaldaýshy dep jolaýshylardy, bagajdy, júkterdi nemese poshtany aqyly negizde jetkizetin tulǵa tanylady. Al kompanııanyń qarapaıym jeńil avtokóligi bul sanatqa jatpaıdy, — dep túsindirdi Arys Danagatov.
Demek kompanııanyń negizgi qyzmeti tasymalmen baılanysty bolmasa jáne avtokólik tek qyzmettik maqsatta paıdalanylsa, kóliktiń uıym menshiginde bolýy júrgizýshini kún saıyn reıs aldyndaǵy medıtsınalyq tekserýden ótkizýge mindettemeıdi.
Sonymen qatar jumysshylardyń merzimdik medıtsınalyq tekserýden ótý tártibi bar. Ol Densaýlyq saqtaý mınıstrligi bekitken óndiristik orta faktorlary men kásipter tizbesine sáıkes júrgiziledi. Mundaı tekserý jumysqa qabyldanǵan kezde jáne odan keıin belgilengen merzim saıyn ótkizilýi múmkin. Alaıda ony kúndelikti reıs aldyndaǵy medıtsınalyq tekserýmen shatastyrmaǵan jón.
Medıtsınalyq tekserýden ótpegeni úshin qandaı aıyppul bar?
Júrgizýshini mindetti reıs aldyndaǵy medıtsınalyq tekserýden ótkizbeı jolǵa shyǵarǵany úshin ákimshilik jaýapkershilik jolaýshylardy, bagajdy jáne júkterdi tasymaldaý qyzmetine qatysty qoldanylady.
Zańger keltirgen túsindirmege sáıkes, aıyppul mólsheri:
- Laýazymdy tulǵalar men shaǵyn kásipkerlik sýbektileri úshin — 30 AEK;
- Orta kásipkerlik sýbektileri úshin — 40 AEK;
- Іri kásipkerlik sýbektileri úshin — 50 AEK.
Sonymen birge zańgerdiń aıtýynsha, tasymaldaýmen aınalyspaıtyn kompanııalardyń qarapaıym qyzmettik jeńil avtokólikterine bul talapty qoldanýǵa negiz joq.
Polıtsııa medtekserý belgisin talap etse, ne isteý kerek?
Eger qujattardy tekserý kezinde polıtsııa qyzmetkeri júrgizýshiden reıs aldyndaǵy medıtsınalyq tekserýden ótkeni týraly belgisi bar jol paraǵyn talap etse, júrgizýshi nemese kompanııa ókili uıymnyń negizgi qyzmet túrin túsindirýi kerek.
Atap aıtqanda kompanııanyń negizgi ekonomıkalyq qyzmet túrin kórsetetin EQJJ (OKED) kodtary týraly málimetti usynýǵa bolady. Eger osy túsindirmege qaramastan kompanııaǵa qatysty ákimshilik hattama toltyrylsa, oǵan shaǵym túsirýge bolady. Zańgerdiń túsindirýinshe, shaǵymda reıs aldyndaǵy medıtsınalyq tekserýden ótý mindeti tek tasymaldaýshylarǵa qatysty ekenin kórsetý qajet.
Aıta keteıik, buǵan deıin, Qazaqstannyń úsh tasjolynda 9 qarashadan bastap kólikterdiń ortasha jyldamdyǵyn baqylaý bastalatynyn habarlaǵan edik.
