Qazaqstanda qandaı jasandy ıntellekt servısteri kóp qoldanylady
ASTANA. KAZINFORM – Jasandy ıntellekt (JI) áldeqashan bolashaqtyń tehnologııasy bolýdan qaldy. Búginde JI negizindegi servıster mátin jazýǵa, aqparat izdeýge, sýret jasaýǵa, qujattardy taldaýǵa, mátinderdi aýdarýǵa, baǵdarlamalaýǵa jáne kúndelikti mindetterdi oryndaýǵa kómektesedi.
Tanymal servısterdiń kópshiligi tegin qoljetimdi bolǵanymen, keńeıtilgen múmkindikterdi paıdalaný úshin aqyly jazylym rásimdeý usynylady. Osyǵan baılanysty Kazinform tilshisi sholý jasady.
Statcounter Global Stats derekterine sáıkes, ChatGPT Qazaqstandaǵy eń tanymal jasandy ıntellekt chat-boty bolyp qala beredi jáne naryqtyń 76,67%-yn ıelenedi. Ekinshi orynda Google Gemini (12,97%), odan keıin Perplexity (4,87%), Claude (4,43%) jáne Microsoft Copilot (1,05%) ornalasqan.
Bul kórsetkishter Qazaqstandaǵy JI chat-bottary naryǵynda amerıkalyq tehnologııalyq kompanııalardyń servısteri basym ekenin kórsetedi.
ChatGPT
Bul álemdegi eń tanymal jasandy ıntellekt kómekshileriniń biri sanalady. Ol mátin jazý, aqparat izdeý, qujattardy taldaý, baǵdarlamalaý, keskinder jasaý jáne jumysqa qatysty túrli tapsyrmalardy oryndaý úshin qoldanylady.
Baǵasy:
Tegin nusqasy – qoljetimdi;
ChatGPT Plus – aıyna 20 AQSh dollary (shamamen 11 myń teńge).
Google Gemini
Gemini – Google kompanııasy ázirlegen jasandy ıntellekt. Ol Gmail, Google Docs, Google Drive jáne Google ekojúıesiniń basqa da servısterimen tyǵyz yqpaldastyrylǵan.
Baǵasy:
Tegin nusqasy – qoljetimdi;
Google AI Pro – aıyna 19,99 AQSh dollary (shamamen 11 myń teńge).
Claude
Claude – Anthropic kompanııasynyń jasandy ıntellektisi. Ol ásirese úlken kólemdegi mátindermen, taldaý jumystarymen jáne zertteýlermen aınalysatyn mamandar arasynda keńinen qoldanylady.
Baǵasy:
Tegin nusqasy – qoljetimdi;
Claude Pro – aıyna 20 AQSh dollary (shamamen 11 myń teńge).
Microsoft Copilot
Bul jasandy ıntellekt kómekshisi Word, Excel, PowerPoint, Outlook jáne Microsoft ónimderiniń basqa da baǵdarlamalaryna biriktirilgen.
Baǵasy:
Tegin nusqasy – qoljetimdi;
Copilot Pro – aıyna 20 AQSh dollary (shamamen 11 myń teńge).
Perplexity AI
Bul servıs izdeý júıesiniń múmkindikterin jasandy ıntellektimen úılestiredi. Onyń jaýaptary paıdalanylǵan derekkózderge siltemelermen birge usynylady.
Baǵasy:
Tegin nusqasy – qoljetimdi;
Perplexity Pro – aıyna 20 AQSh dollary (shamamen 11 myń teńge).
Grok
xAI kompanııasynyń neırojelisi ózekti aqparatty izdeýge jáne X áleýmettik jelisimen ıntegratsııaǵa erekshe nazar aýdarady.
Baǵasy:
Tegin nusqasy – shekteýli múmkindiktermen;
SuperGrok – aıyna 30 AQSh dollary (shamamen 16,5 myń teńge).
DeepSeek
DeepSeek – tildik modelderine tegin qoljetimdilik usynýy arqyly tanymal bolǵan qytaılyq jasandy ıntellekt servısi.
Baǵasy:
Negizgi nusqasy – tegin;
Jeke aqyly tarıfter ázirleýshiler men korporatıvtik klıentterge arnalǵan.
Meta AI
Meta AI – Meta kompanııasynyń ekojúıesine engizilgen jasandy ıntellekt kómekshisi. Qazirgi ýaqytta onyń qoljetimdilik geografııasy birtindep keńeıip keledi.
Baǵasy:
Paıdalanýshylardyń basym bóligi úshin – tegin.
Le Chat (Mistral AI)
Le Chat – aqparat izdeýge, mátin jazýǵa jáne qujattardy taldaýǵa arnalǵan eýropalyq jasandy ıntellekt servısi.
Baǵasy:
Tegin nusqasy – qoljetimdi;
Le Chat Pro – aıyna 14,99 AQSh dollary (shamamen 8 myń teńge).
NotebookLM
NotebookLM – Google ázirlegen servıs. Ol qujattardy, ǵylymı maqalalardy, kitaptardy jáne jeke jazbalardy jasandy ıntellekt kómegimen taldaýǵa múmkindik beredi.
Baǵasy:
Negizgi nusqasy – tegin;
NotebookLM Plus keńeıtilgen múmkindikteri Google AI Pro jazylymynyń quramyna kiredi.
Keń tańdaý bolǵanyna qaramastan, paıdalanýshylardyń basym bóligi tegin nusqalardy qoldanady. Degenmen, aqyly jazylymdar jasandy ıntellektiniń qýatty modelderine qol jetkizýge, suranystar lımıtin arttyrýǵa, sýret generatsııasynyń keńeıtilgen múmkindikterin paıdalanýǵa, daýystyq rejımdi qoldanýǵa, kólemdi qujattarmen jumys isteýge jáne basqa da qosymsha fýnktsııalardy paıdalanýǵa jol ashady.
Jazylymdardyń quny ázirleýshilerdiń resmı tarıfteri negizinde kórsetilgen. Naqty tólenetin soma elge, valıýta baǵamyna, salyqtarǵa jáne jazylymdy rásimdeý tásiline (resmı saıt, App Store nemese Google Play arqyly) baılanysty ózgerýi múmkin.
Buǵan deıin, Qazaqstanda ChatGPT júıesinde qazaq tiliniń qoldanysy keńeıtilmek ekenin jazǵanbyz.
