Qazaqstanda qandaı taýarlardy shetelge eksporttaýǵa tyıym salynǵan

ÓSKEMEN. QazAqparat – Shyǵys Qazaqstan oblystyq aqparat ortalyǵynda ótken baspasóz máslıhatynda ShQO memlekettik kirister departamenti basshysy orynbasarynyń mindetin atqarýshy Rýslan Nurlybekov elden qandaı taýarlardy áketýge tyıym salynǵanyn aıtyp berdi, dep habarlaıdy QazAqparat tilshisi.

Osy jyldyń 1 qańtarynan bastap QR Salyq kodeksine engizilgen birqatar ózgerister kúshine endi.

«QR SK 444-baby 7-tarmaǵyna sáıkes salyq organdary Eýrazııalyq ekonomıkalyq odaqqa múshe memleketter aýmaǵynan Qazaqstanǵa taýar ımporttaý kezinde salynatyn salyq mólsherin ýákiletti organ aıqyndaǵan tártippen túzetýge quqyly. Import kezinde baǵanyń eń tómengi deńgeıi qoldanylatyn taýarlardyń jekelegen túrleriniń tizbesi bekitilgen. Búgingi tańda tizbege birqatar alkogol ónimderi ǵana engizilip otyr», - dedi ol.

Eldiń ekonomıkalyq qaýipsizdigi maqsatynda keıbir taýarlardy elden shyǵarýǵa tyıym salyndy.

«Qazaqstan Prezıdentiniń 14 naýryzdaǵy Jarlyǵymen el aýmaǵynan 10 000 AQSh dollarynan asatyn aqshany áketýge tyıym salyndy. Sondaı-aq 5, 10, 20, 50 jáne 100 gramm affınırlengen altyn quımalaryn jáne Ulttyq bank shyǵaratyn ALTYN BARYS altynynan jáne KÚMIS BARYS kúmisinen jasalǵan ınvestıtsııalyq monetany, 100 gramnan asatyn affınırlengen altyndy áketýge bolmaıdy. QR Indýstrııa jáne ınfraqurylymdyq damý mınıstriniń 21 sáýirdegi buıryǵymen alty aı merzimge el aýmaǵynan alıýmınıı, qorǵasyn qaldyqtary men synyqtary, akkýmýlıator qaldyqtary men synyqtary, quramynda qorǵasyn, kadmıı bar ózge de qaldyqtardy áketýge shekteý qoıyldy», - dedi Rýslan Nurlybekov.

2022 jyldyń 22 qańtarynan bastap alty aı merzimge Qazaqstan aýmaǵynan tiri iri qara maldy, qoı men eshkini áketýge ruqsat joq.

Budan bólek, qant eksportyna tyıym salynyp otyr.