Qazaqstanda qandaı mamandyqtarǵa suranys artady
ASTANA. QazAqparat - Qazaqstanda aldaǵy jyldary ónerkásip, qurylys, kólik jáne osyǵan uqsas basqa da salalardaǵy kásibı mamandar men jumysshylarǵa degen suranys joǵary bolady. Bul týraly májilismen Erjan Qudaıbergenniń depýtattyq saýalyna jaýap bergen QR Premer-mınıstriniń orynbasary Erbolat Dosaevtyń jaýabynda jazylǵan, dep habarlaıdy QazAqparat tilshisi.
Erbolat Dosaev keltirgen málimetke sáıkes, osy jyly tehnıkalyq jáne kásiptik bilim (TjKB) berý oqý oryndarynda memlekettik tapsyrys boıynsha bilim alǵan túlekterdiń sany 73 myń adamdy quraǵan. Zańǵa sáıkes halyqty jumyspen qamtý máseleleri jónindegi ýákiletti organ Eńbek jáne halyqty áleýmettik qorǵaý mınıstrligi eldegi jumys kúshine suranys pen usynysty taldap, boljaıdy. Osydan keıin atalmysh vedomstvo eńbek naryǵynyń jaı-kúıi týraly Úkimetke habardar etedi.
«2017 jyly eńbek naryǵynyń qajettiligin aıqyndaý úshin 10 myńǵa jýyq kásiporyndar men uıymdarǵa saýalnama júrgizildi. Saýalnamanyń nátıjesi boıynsha kásiporyndar men uıymdar 2018 jyldyń aıaǵyna deıin 226,1 myń adamdy jaldaýy múmkin. Onyń ishinde 54,7 myńy - kásibı mamandar, 38,9 myńy - jumysshy ónerkásibi men birtektes kásipterdiń jumysshylary, 32,9 myńy basshylar tobyna jatady. Osylaısha, ónerkásip, qurylys, kólik jáne basqa da uqsas salalardaǵy kásibı mamandar men jumysshylarǵa degen suranys joǵary bolady dep kútilýde», - delingen Erbolat Dosaevtyń jaýabynda.
Aıta ketsek, budan buryn Parlament Májilisiniń depýtaty Erjan Qudaıbergen Premer-mınıstrdiń orynbasary Erbolat Dosaevqa depýtattyq saýal joldap, aldaǵy jyldary TjKB boıynsha qandaı mamandyqtarǵa suranystyń joǵary ekenin anyqtaýdy suraǵan bolatyn. Depýtattyń aıtýynsha, memlekettik bilim tapsyrysy boıynsha daıyndalyp júrgen mamandyqtarǵa búgingi tańda suranysty anyqtap alý kerek. Bolmaǵan jaǵdaıda bul máseleni eskermeý jumyssyzdyqqa, memleket qarjysyn tıimsiz jumsaýǵa ákeledi.
