Qazaqstanda qandaı kólikter qaıtalama naryqta jıi satylady
ASTANA. QazAqparat - Qazaqstandyq avtobıznes qaýymdastyǵy Qazaqstandaǵy qaıtalama naryqta eń jıi satylatyn kólik markalarynyń úshtigin atady, dep habarlaıdy QazAqparat tilshisi.
Qazaqstandyq avtobıznes qaýymdastyǵynyń keltirgen málimetine sáıkes, jyl basynan beri 8 aıdyń ishinde elimizde tirkelgen Lexus markaly kólikterdiń árbir úsheýi óziniń qojaıynyn aýystyrǵan. Naqtyraq aıtqanda, Qazaqstanda dál osy marka boıynsha 60,5 myń avtokólik bar. 2018 jyldyń qańtar-tamyz aılarynda atalǵan marka kólikterine baılanysty 20,1 myń kólikti (úshten biri) tirkeý nemese qaıta tirkeý júrgizilgen.
«Sonymen birge, qazaqstandyqtar BMW markaly kólikterin jıi aýystyrady. Qazaqstanda atalmysh aralyqta 22,8 myń dana BMW markaly avtokóliktiń qojaıyny aýysqan (Qazaqstanda osy aralyqtaǵy jalpy BMW markaly avtokólikterdiń 31,1 paıyzy). Mercedes-Benz markasy da ótimdi. Naqtyraq aıtqanda, atalmysh markamen esepte turǵan 181,8 myń kóliktiń 53,8 myńy (besten biri) qaıta satylǵan. Avtokólik ıeleri basym jaǵdaıda KSRO kezinde qurastyrylǵan «Jıgýlı», «Moskvıch» pen «Zaporojets» markaly kólikterin sırek aýystyrady», - delingen Qazaqstandyq avtobıznes qaýymdastyǵynyń málimetinde.
Jalpy, Qazaqstanda 2018 jyldyń 1 qyrkúıegindegi kórsetkish boıynsha tehnıkanyń barlyq túri boıynsha 4,4 mln dana kólik tirkelgen. Olardyń - 768,8 myńy «Lada» (atalmysh markaly kóliktiń 93,6 myńy, ıaǵnı toǵyzdan biri qaıta satylǵan) markaly kólikter bolsa, 446,7 myńy «Toyota» markaly kólikter (olardyń tórtten biri qaıta satylǵan). Úshinshi orynda 284,3 myń danalyq kórsetkishpen - «Volkswagen» markasy tur. «Volkswagen» markaly kólikterdiń 55,3 myńy (besten biri) qaıta satylǵan.
