Qazaqstanda qandaı azyq-túlik arzandap, qaısysy qymbattady

Úkimette Premer-mınıstrdiń orynbasary — ulttyq ekonomıka mınıstri Serik Jumanǵarınniń tóraǵalyǵymen ótken keńeste ınflıatsııanyń ózgerý dınamıkasy men baǵany turaqtandyrý sharalary qaraldy.

Saýda jáne ıntegratsııa mınıstrliginiń málimetinshe, azyq-túlik ınflıatsııasy ekinshi aı qatarynan tómendegen, baǵanyń 0,1% deńgeıindegi deflıatsııalyq úrdis saqtalyp otyr. Baǵa ósiminiń baıaýlaýyna áleýmettik mańyzy bar azyq-túlik taýarlary aıtarlyqtaı áser etýde. Jyl basynan beri bul taýarlardyń baǵasy 1,8%-ǵa ósti. Al ótken jyldyń sáıkes kezeńinde ósim 8,3%-dy quraǵan. ıAǵnı, bıyl baǵa ósimi 4,6 ese tómen.

Ótken aptada qant 2,4%-ǵa, pııaz 1,7%-ǵa, alma men sábiz 0,9%-ǵa, kúrish 0,5%-ǵa, qoı eti 0,4%-ǵa arzandady. Al nan, makaron ónimderi, sary maı, tuz jáne shaı baǵasy ózgergen joq.

Sonymen qatar kúnniń sýytýyna baılanysty qııar baǵasy 4,6%-ǵa, qyryqqabat pen qyzanaq 3,7%-ǵa, kartop 2,4%-ǵa qymbattady. Aldaǵy qys jáne kóktem aılarynda jylyjaıda ósiriletin kókónisterdiń baǵasyn turaqtandyrý maqsatynda óndirýshilermen tıisti memorandýmǵa qol qoıylady.

Baǵany turaqtandyrýdyń tıimdi joldarynyń biri — aýyl sharýashylyǵy jármeńkeleri. Munda óndirýshiler óz ónimderin tutynýshylarǵa tikeleı usynady. Budan bólek, 17–27 qazan aralyǵynda elimizdiń barlyq óńirinde «Bereke Fest» jáne «Republic Day» aktsııalary ótýde. Olarǵa 649 saýda nysany qatysýda. Aktsııalar aıasynda satyp alýshylarǵa kúndelikti tutynatyn taýarlar men suranysqa ıe azyq-túlik ónimderi 50%-ǵa deıingi jeńildikpen usynylady.

Keńes barysynda Serik Jumanǵarın azyq-túlik ınflıatsııasy ósken oblystardyń ákimdikterin tyńdady. Sondaı-aq barlyq óńirge aýyl sharýashylyǵy jármeńkeleriniń sanyn arttyryp, halyq kóp tutynatyn azyq-túlik ónimderin qoljetimdi baǵamen jetkilikti kólemde qamtamasyz etýdi tapsyrdy.

Buǵan deıin ShQO-da áleýmettik mańyzy bar azyq-túlik baǵasyn ósirgen 100 kásipkerge aıyppul salynǵanyn jazǵanbyz.