Qazaqstanda qandaı aýrýǵa shaldyqqandarǵa tegin dári-dármek beriledi

AQTAÝ. QazAqparat - Mańǵystaý oblysynda ótken jyly 218 966 adam tegin dári-dármek alǵan, dep habarlaıdy QazAqparat tilshisi.

«Naýqastardyń tegin medıtsınalyq kómektiń kepildik berilgen kólemi aıasynda jumys jasaıtyn dárihanadan tegin dári alýǵa múmkindigi bar. Ol úshin retsept pen jeke kýáligin kórsetýi kerek»,-deıdi Mańǵystaý oblystyq densaýlyq saqtaý basqarmasynyń basshysy Amanbek Jumyrov.

Tegin beriletin dárilerdi tek belgili bir aýrý túrlerine shaldyqqandar ǵana ala alady.

Olar:

- Qan aınalym júıesi aýrýlary;

- As qorytý júıesiniń aýrýlary;

- Qan, qan aınalym organdarynyń aýrýlary jáne ımmýndyq júıege qatysty aqaýy;

- Endokrındik júıe aýrýlary, tamaqtanýdyń buzylýy jáne zat almasý protsesindegi ózgerister;

- Súıek-bulshyq et júıesiniń jáne dáneker tin aýrýlary;

- Júıke júıesiniń aýrýlary;

- Minez-qulyq jáne psıhıka júıesindegi aýytqýlar;

- Juqpaly jáne parazıttik aýrýlardyń keı túrleri;

- Іsikter;

- Tynys alý organdarynda kezdesetin aýrýlar;

- Aǵzalar men tin aýystyrý operatsııasynan keıin;

- Nesep-jynys joldarynda kezdesetin aýrýlarmen aýyratyn naýqastar.

Sonymen qatar 18 jasqa tolmaǵan qant dıabetine shaldyqqan jasóspirimder de ınsýlındik pompa men oǵan arnalǵan rezervýar, ınfýzııalyq jıyntyqpen tegin qamtamasyz etiledi.

Al qant dıabetimen aýyratyn naýqastarǵa qalam-shprıtske arnalǵan ıne, ınsýlınge arnalǵan tańbalanǵan bir rettik shprıts pen qandaǵy glıýkoza mólsherin anyqtaıtyn test jolaqtar men nájistegi ketondyq denelerge arnalǵan test jolaqshalary tegin beriledi.

Aıta keteıik, dári-dármekti aıyna bir retten artyq alýǵa bolmaıdy. Sonymen qatar, dári sany emdeý kýrsyna baılanysty bolady.

Emdeý kýrsy uzaq bolǵan jaǵdaıda dári-dárimek úsh aıǵa eseptep beriledi.