Elimizde qandas mártebesin uzartý tártibi jeńildetildi

ASTANA. KAZINFORM – Qazaqstanda elge oralǵan qandastardyń beıimdelý tıimdiligin arttyrý jáne ómir súrý jaǵdaıyn jaqsartý maqsatynda birqatar shara júzege asyrylyp jatyr.

- Bıyl tarıhı otanyna 11 012 etnıkalyq qazaq oralyp, qandas mártebesin aldy. Táýelsizdik alǵaly 1 mln 159,1 myń etnıkalyq qazaq kóship kelgen. 2025 jylǵy 1 qazanǵa deıingi derek boıynsha eńbekke qabiletti jastaǵy etnıkalyq qonys aýdarýshylar sany 6 431 adamǵa jetti (58,4%). Onyń ishinde kámeletke tolmaǵandar – 3 607 (32,8%), zeınetkerler – 974 (8,8%) bar, - dedi Eńbek jáne halyqty áleýmettik qorǵaý birinshi vıtse-mınıstri Asqarbek Ertaev ortalyq kommýnıkatsııalar qyzmeti alańynda ótken baspasóz máslıhatynda.

Vıtse-mınıstrdiń málimdeýinshe, sheteldegi qandastardyń tarıhı otanyna oralýynda oń dınamıka baıqalady.

- Qandastardyń beıimdelý tıimdiligin arttyrý jáne ómir súrý jaǵdaıyn jaqsartý maqsatynda birqatar shara júzege asyrylyp jatyr. Atap aıtqanda, qandas mártebesin uzartý tártibi jeńildetildi, óńirlerde qandastardy jumyspen qamtý jáne beıimdeý jónindegi baǵdarlamalar bekitildi. Sonymen qatar Qazaqstanǵa kelý, turý jáne ıntegratsııalaý rásimin jeńildetýge baǵyttalǵan «Ata joly» kartasynyń ıelerin yntalandyrý sharalary ázirlenip jatyr, - dep tolyqtyrdy.

Buǵan deıin elimizde kóshi-qon aǵynyn taldaý ortalyǵy qurylatyny týraly habarlaǵan edik.

Sondaı-aq osy aıda arnaıy operatsııa kezinde elordada zańsyz kóshi-qon arnasy áshkerelendi.