Qazaqstanda qandas mártebesin berýdiń jańa tártibi engiziledi
ASTANA. KAZINFORM – Eńbek jáne halyqty áleýmettik qorǵaý mınıstrligi qandas mártebesin berý nemese uzartý erejelerine ózgerister engizbek.
Túzetýlerge sáıkes, endi «qandas» mártebesin berý týraly ótinishti «Qutty meken» mobıldi qosymshasy, Qazaqstan Respýblıkasynyń shet elderdegi mekemesi arqyly ǵana emes, sonymen qatar qujattardy qosa bere otyryp, memlekettik korporatsııa arqyly berýge bolady.
Respýblıkanyń shet elderdegi mekemesi arqyly berilgen ótinishti shet elderdegi mekemeniń qyzmetkeri «qandas» AAJ-da tirkeıdi jáne onyń tirkelgeni týraly habardar ete otyryp, Halyqty áleýmettik qorǵaý jáne jumyspen qamtý máseleleri jónindegi jergilikti atqarýshy organǵa jiberedi.
Memlekettik korporatsııaǵa júgingen kezde qujattardy qabyldaý kúni memlekettik qyzmet kórsetý merzimine kirmeıdi. Ótinish berýshi memlekettik korporatsııaǵa qoldanylý merzimi ótken paketti nemese qujattardy tolyq usynbaǵan jaǵdaıda, qyzmetker ótinishti qabyldaýdan bas tartý týraly qolhat beredi.
Ótinish berýshi qujattardyń tolyq toptamasyn usynǵan kezde memlekettik korporatsııanyń qyzmetkeri ótinishtiń qabyldanǵany týraly habarlama jiberedi. Sondaı-aq, ótinish berýshi memlekettik korporatsııaǵa júgingen jaǵdaıda, qujattardy Halyqty áleýmettik qorǵaý jáne jumyspen qamtý máseleleri jónindegi jergilikti atqarýshy organǵa berý «Elektrondyq úkimet» júıesi arqyly júzege asyrylady.
Sonymen qatar, qujattardy qaraý merzimi eki ese qysqardy. Máselen, ótinish berýshilerdiń qujattaryn alǵan sátten bastap 10 jumys kúni ishinde Іshki ister jáne Ulttyq qaýipsizdik organdarynyń aýmaqtyq bólimsheleri Qazaqstan Respýblıkasynyń aýmaǵyndaǵy quqyq buzýshylyqtar jáne onyń terrorıstik nemese ekstremıstik uıymdarǵa qatysty aıyptaýshy málimetterdiń bolýy nemese bolmaýy týraly aqparatty Halyqty áleýmettik qorǵaý jáne jumyspen qamtý máseleleri jónindegi jergilikti atqarýshy organdarǵa jiberedi.
Komıssııa ótinish kelip túsken kúnnen keıin 5 jumys kúni ishinde ony qaraıdy jáne ótinish berýshige «qandas» mártebesin berýden bas tartý nemese qandas mártebesin berý týraly usynys shyǵarady. Bul protsedýrany komıssııa qabyldaıdy jáne hattamamen resimdeıdi. Osydan keıin, Halyqty áleýmettik qorǵaý jáne jumyspen qamtý máseleleri jónindegi jergilikti atqarýshy organ komıssııa usynym shyǵarǵan kúnnen keıin 1 jumys kúni ishinde ótinish berýshige «qandas» mártebesin berý nemese berýden bas tartý týraly sheshim qabyldaıdy. Sodan soń «Qutty meken» aqparattyq júıesi arqyly qabyldanǵan sheshimdi ótinish berýshige, Qazaqstan Respýblıkasynyń shet elderdegi mekemesine nemese memlekettik korporatsııaǵa jiberedi.
Eger ótinish berýshige «qandas» mártebesi berilse, ótinish berýshi qonystandyrý aımaǵyna kelgen kúnnen keıin 3 jumys kúni ishinde Halyqty áleýmettik qorǵaý jáne jumyspen qamtý máseleleri jónindegi jergilikti atqarýshy organ:
- jeke beıimdelý jáne ıntegratsııa josparyna qol qoıady;
- Úkimet aıqyndaǵan óńirlerge qonystanǵan jaǵdaıda áleýmettik kelisimshartqa qol qoıady;
- qandas mártebesi týraly sheshimniń kúshine engeni týraly «qandas» AAJ-ǵa belgisi bar kýálik beredi.
Odan bólek, Halyqty áleýmettik qorǵaý jáne jumyspen qamtý máseleleri jónindegi jergilikti atqarýshy organnyń «qandas» mártebesin uzartý ne uzartýdan bas tartý týraly sheshimi ótinish berýshini habardar etý úshin «Elektrondyq úkimet» júıesi arqyly 1 jumys kúni ishinde memlekettik korporatsııaǵa jiberedi.
Qujat 30 mamyrǵa (2024 jyl) deıin ashyq talqylaý úshin «Ashyq NQA» saıtynda ornalastyrylǵan.
